ARGIA.eus

2020ko urriaren 01a

Mobilizazio handia espero dute gaurko, Macronen pentsio erreformaren kontra

  • Langile sindikatuen eta herritarren babesik ez dauka Emmanuel Macron Frantziako presidenteak bideratu pentsio sistemaren erreformak. Ipar Euskal Herrian, CGC, CGT, FO, FSU, LAB, Solidaires eta Unsa Education sindikatuek deitu dute greba orokorrera. Manifestazioa Baionako Lan Boltsatik abiatuko da ostegun honetan 10:30ean. ARGIAk jarraipen berezia eginen du Twitter bidez.

     

ARGIA @argia
2019ko abenduaren 04a
CGC, CGT, FO, FSU, LAB, Solidaires eta Unsa Education sindikatuek deitu dute greba orokorrera

Pentsio sistemaren erreformaren kontrako mobilizazio eguna dute gaur Frantziaren meneko diren lurraldeetan eta jendetsua eta determinatua izango dela aurreikusi daiteke. Sektore publikoan zein pribatuan egingo duten greba orokorrarekin irudikatuko dute desadostasuna ostegun honetan.

Ipar Euskal Herrian, CGC, CGT, FO, FSU, LAB, Solidaires eta Unsa Education sindikatuek deitu dute grebara. Sektore publikoan azkarki sentituko da greba, besteak beste, garraio publikoetan, ikastetxeetan, Baionako auzitegian, haurzaindegietan, ospitaleetan, zabor bilketen kudeaketan... Sektore pribatuan ere sentituko da mobilizazioa. Manifestazioa 10:30etan abiatuko da Baionako Lan Boltsatik.

Erreforma horrek klima aldaketaren areagotzea dakarrela azaldurik, protestari lotzeko deia luzatu dute Bizi! gisako hainbat talde ekologistek. Jaka Horiak ere batuko dira manifestazioei. Biharamunean ere grebarekin jarraitzeko asmoa sendi da hainbat sektore edota enpresetan eta sindikatu gehienek bilerak eginen dituzte ostegun gauean, segidaz erabakitzeko.

Pentsioen indibidualizazioa

Pentsioen apaltzea ondorioztatuko luke Macronek aurkeztu erreformak. Hain zuzen, erretretei bideratu dirua Frantziaren BPGaren %14era mugatuko du Gobernuak. Jakinda pentsiodunen kopurua azkarki emendatuko dela datorren urteetan, bai ala bai apalagoa izango da bakoitzari bideraturiko pentsioa. Gainera, pentsioa kalkulatzeko erreferentzia urteak ere aldatuko dira: orain arte bezala hogeita bost urte hoberenak hartu beharrean, urte guztiei begiratuko zaie. Erretreta heinaren apaltzea ondorioztatuko du horrek ere.

Puntutako sistema jarriko dute martxan eta hori da erreformaren aldaketa nagusietariko bat. Langileak puntu batzuk bilduko ditu bere lan bizitzan zehar, eta erretretara heltzerakoan, puntu horiek euro bihurtuko dira, indize baten arabera. Kontua da puntu horiek ez dutela balio finkoa ukango. Erretretara sartzerako urtean puntuak daukan balioaren araberakoa izango da erretretaren heina. Puntuaren balioa finkatzeko orduan, egoera finantzarioaren oreka mantentzea izango dute helburu.

Kapitalizazio sistemari bidea irekiz

Kapitalizazio sistema osagarri bati irekitzen dio bidea Macronen erreformak. Hau da, erretreta hartzen duenerako dirua gordetzeko aukera ukango du aktiboak. Gaur egun, aberatsenei mugatua du banaketa sistematik atera eta kapitalizazio sistemara pasatzeko aukera (hilabetean 27.000 euro gordin baino gehiago irabazten dutenei) baina erreformarekin, hilabetean 10.000 euro gordin baino gehiago irabazten duenari emango zaio aukera. Baliteke ondoko urteetan muga hori oraindik gehiago apaltzea eta beraz kapitalizazio sistemak behin betikoz tokia hartzea elkartasunean oinarrituriko sistemari.

 

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Pentsioak  |  Pentsioak  |  Frantziako Gobernua

Pentsioak kanaletik interesatuko zaizu...

Azkenak
EGILEA
Argia buletina
Egunaren laburpena
zure e-postan
Eguneraketa berriak daude