Astelehen honetan aurkeztu dute elkarte memorialistek Gipuzkoako Batzar Nagusietan La Cumbre memoria leku gisa egokitzeko proiektua. Jauregia Espainiako Gobernuaren jabetzakoa den arren, 2022ko urriaren 19an Memoria Demokratikoaren Legea onartu zen, eta La Cumbre zein Ezkabako gotorlekua memoria leku moduan aitortu zituen. Legea onartu eta urte betera aplikatu beharko litzateke erabakia, 2023ko urrian.

Proposamenean kokalekuaren etorkizuneko erabileren oinarriak finkatu dituzte estatu terrorismoaren biktimen senideek, Aranzadi zientzia elkarteak, Egiari Zor-ek, Argituz-ek, Mikel Zabalza Herri Ekimenak eta Berridatzi Elkarteak. Frankismo eta Trantsizio garaietako errepresioari buruzko erakusketa iraunkorra, pedagogia eta dibulgazio zerbitzua, webgunea, argitu gabeko kasuak ikertzeko gunea eta akonpainamendu psiko-sozialerako gunea sortzea proposatu dute, besteak beste.

Aurkezpenean izan dira Asun Lasa eta Pili Zabala senitartekoak, eta Javi Buces Aranzadi Zientzia Elkarteko ikertzailea. Eraikina lehenbailehen Donostiako Udalaren esku uztea eskatu dute. Zabalak adierazi du ez duela ulertzen “hainbeste erresistentzia” lege batean idatzita dagoen mandatu bat betetzeko.

Berehalako lagapena

Egitasmoaren aurkezpenaren ostean hartu dute hitza batzarkideek. EH Bilduko Luis Barigarrementeriak bat egin du elkarte memorialisten proposamenarekin eta lagapena "ahalik eta azkarren" egin behar dela adierazi du, hori izango delako "abiapuntua".

EAJko Ianko Ganboak ere lagapena gauzatzeko beharra aldarrikatu du. La Cumbre memoria kolektiborako tokia izan behar dela adierazi du, baina fokua Lasa eta Zabalaren bahiketan, torturan eta hilketan jarri behar dela, Berriak jaso duenez.

PPren ordezkaritza hartu du Jorge Motak, Donostiako Udaleko zinegotziak. Ángel Jesús Mota Martuteneko espetxeko funtzionario ohiaren anaia da bera, 1990ean ETAk buruan tiro eginda hil zuena. ETAren biktimei ere aitortza eman behar zaiela azaldu du, eta La Cumbren lekua izan beharko luketela.