Erreniegako monumentua, 2017an inauguratua, hogei harrik osatzen dute. Erdikoa Peio Iraizozek landua da, eta desagertutako pertsona guztiak oroitzen ditu. Inguruan dauzka beste hemeretzi harri, biktimen sorterriak irudikatzen dituztenak.

Erreniegako Hilobiak elkarteak antolatutako ekitaldian dozenaka lagun bildu dira joan den igandean. "Egia ezagutzen dugu, baina justiziaren zain gaude oraindik", adierazi du Carlos Urra de Andresek, frankistek hildako pertsona baten senide eta aipatu elkarteko presidenteak. "Memoriarako eguna da gaurkoa, omenaldia egin eta gogoratzekoa. Duela zortzi urte altxa genuen memorial hau, gertatu zena sekula ez dadin ahaztu. 47 urte pasa dira familia asko desobiratzeetara etorri zirenetik euren hildakoak jasotzera. Eta 89 urte dira familia askok euren senideez deus ez dakitela, soilik frankistek fusilatu egin zituztela. Guk urtero etortzen jarraituko dugu, ahaztu ez dadin".

Gaineratu du eskoletan benetako historia irakatsi beharko litzatekeela, curriculumean sartu, belaunaldi berriek gertatu zena ezagutu eta berriro ez errepikatzeko. "Urratsak ematen ari dira, baina oso motzak dira", salatu du. "Monumentu frankistei esanahi berria ematen zaie, eta guk benetako errekonozimendu baten zain jarraitzen dugu. Agian familiok ez gara ezertan adituak, baina egia ezin dela dirulaguntza bat izan oihukatzen jarraituko dugu, justiziak ezin duela izapide administratibo bat izaten jarraitu, eta erreparazioa ezin dela bide bazterreko plaka batera mugatu".