Karlos Apeztegia kartzelaratzeko agindu du Espainiako Auzitegi Nazionalak

Etxerat euskal presoen senide eta lagunen elkarteak Hernanin duen bulegoan egiten du lan Karlos Apeztegiak. Asteartean bertatik atera zenean atxilotu zuen Guardia Zibilak eta asteazken goizean, espetxeratzeko agindua eman du Espainiako Auzitegi Nazionaleko epaileak, "erakunde terroristako kide" izatea leporatuta.

21 urteko kartzela zigorra egina du Apeztegiak eta 2013ko maiatzean geratu zen aske. Orain, Saintesen eginiko operazio batean Frantziako Gobernuak konfiskaturiko eta ondoren Espainiako Gobernuari igorritako dokumentazioan oinarrituta, 2002. urtean Puertoko espetxean preso zegoenean ETAren zuzendaritzarekin "komunikazio kanal egonkor eta segurua" sortu izana egotzi diote.

Etxeratek kaleraturiko idatzian dioenez, "ustekabean eta atsekabez jaso dugu Karlos Apeztegiaren atxiloketa eta ondorengo espetxean sartzeko agindua”, eta nabarmendu du “gatazkaren ondorioen konponbidean eta bakearen alde, gure elkartearen baitan Karlos Apeztegiak egiten duen ekarpena".

Asteartean bezala, asteazken honetarako ere manifestazioa deitu dute Hernanin, arratsaldeko 20:00etan.

Espainiako Gobernuak "aurreko egoera bortitza mantendu" nahi duela salatu du Sarek

Sare Herritarrak ere oharra kaleratu du: "Urteetako sufrimenduarekin amaitzeko une historiko baten aurrean gauden honetan, aurreko egoera bortitza mantendu eta hain beharrezkoa dugun elkarbizitza egoera zapuzteko ekintza gisa baino ezin ulertu genezake Apeztegiaren espetxeratzea. Espainiarko Gobernu berriari aurrekoak hasitako mendekuan oinarritutako politikarekin ez jarraitzeko eskatu diogu behin eta berriro, jendartearen gehiengoaren behar eta nahiei erantzuteko ordua dela eta giza eskubideen errespetuan, bakearen eta elkarbizitzaren alde zein konponbide bidean aurrera urratsak emateko balentriaz jokatzeko garaia dela azpimarratuz".

Apeztegiak aurkako inolako sententziarik ez duela eta espetxeratzeko akusazioa baliatu izana salatu du Sarek. Babesa adierazi die senide eta lagunei, eta Orain Presoak dinamikak larunbatean Donostian deitu duten manifestazioan parte hartzera deitu ditu herritarrak,"espetxe politika aldatu eta halako gertakariekin amaitzea ezinbestekoa baita elkarbizitza eta bakearen oinarriak eraikitzeko".