Joxe Migel Etxeandia preso-ohiaren gorpua aurkitu dute Gorbeian
Larrialdi zerbitzuak eta lagunak 59 urteko larrabetzuarraren bila zebiltzan azken egunetan. Ostegun goizean aurkitu dute haren hilotza, Gorbeiako Itxina inguruan. Etxeandia 2003tik 2015era izan zuten espetxean eta buruko eritasun larria jasan zuen.
Larrialdi zerbitzuek ostegunean aurkitu dute Joxe Migel Etxeandiaren gorpua, eta hala, bere heriotzaren susmoa berretsi egin dute gertukoek. Inguru hartara igandean joan zen hainbat lagunekin eta orduz geroztik ez dute haren berririk izan.
Etxeandia 2003an atxilotu zuten Mexikon eta Espainiako Poliziari entregatua izan ondoren hamabi urtez izan zen espetxean, atentatu saiakera baten laguntzaile izatea egotzita. Denbora horretan gaixotasun psikiko larria jasan zuen, baina Espainiako espetxe arduradunek ez zuten isolamendutik atera 2011 arte.
Haren heriotza jakin ostean, Larrabetzuko alkate Iñigo Gazteluk adierazi du "momentu tristeak" direla. Sortuko idazkari nagusi Arkaitz Rodriguezek, bere aldetik, "hunkituta" daudela esan du Twitterrez bidalitako mezu batean:
🌹 Hunkituta gaude ezker abertzaleko kideok Josemiren heriotzaren berriarekin.
Doluminak bere senideei, lagunei eta Larrabetzuko herriari.
Adiorik ez, lagun. pic.twitter.com/G2UafiFI2e
— Arkaitz Rodriguez Torres (@arkarodriguez) October 3, 2019
Amnistiaren Aldeko eta Errepresioaren Aurkako Mugimenduak ere oharra kaleratu du senideei dolumina adieraziz eta preso-ohiaren "konpromisoa eta eskuzabaltasuna"· nabarmenduz.
Ostegunean arratsaldeko 20:00etan batzar informatiboa dute egitekoa Larrabetzun.
