Tafallako Kulturgunean jokatu da 2025eko Nafarroako Bertsolari Txapelketako hirugarren eta azken finalaurrekoa, ia 300 lagunen aurrean. Nafarroako Bertsozale Elkarteak antolatu du saioa, Tafallako Udalaren laguntzarekin. Han, zozketak erabakitako ordenean, ondorengo bertsolariak aritu dira kantuan: Amaia Elzagoien Varela, Xabi Maia Etxeberria, Ekain Alegre Gil, Josu Sanjurjo Alzuri, Joanes Illarregi Marzol eta Xabat Illarregi Marzol. Zigor Gartzia 'Zian'ek aurkeztu du saioa, eta epaile lanetan aritu dira Cesar Etxeberria, Joseba Beltza, Mikel Beaumont, Nerea Bruño eta Patxi Barberena. 

Bertsolarien artean, Joanes. Illarregik eskuratu du puntu gehien (528), eta, horrenbestez, azaroaren 29an Nafarroa Arenan jokatuko den finalerako sailkatu da. Horrela gelditu da, zehazki, Tafallako saioko sailkapena:

1. Joanes Illarregi Marzol (528.0)

2. Xabat Illarregi Marzol (516.5)

3. Josu Sanjurjo Alzuri (486.0)

4. Xabi Maia Etxeberria (466.0)

5. Amaia Elizagoien Varela (427)

6. Ekain Alegre Gil (425.0)

Horrenbestez, argitu da zortzi finalisten zerrenda. Agoizko, Leitzako eta Tafallako finalaurrekoetako hiru irabazleei (Eneko Lazkoz, Julio Soto eta Joanes Illarregi) puntuazioaren araberako beste bost bertsolari gehitu zaizkie. Dagoeneko azken hitzordua hori baino ez da falta Nafarroako Bertsolari Txapelketa amaierara iristeko. Azaroaren 29an izango da, lehen aldiz, Nafarroa Arenan.