Zapatuan eta domekan jokatu dira Bizkaiko Bertsolari Txapelketako lehenengo faseko azken bi saioak, Galdakaon eta Getxon, hurrenez hurren, eta osatu da finalaurrekoetara sailkatutakoen zerrenda. Irune Basagoitik bildu ditu puntu gehien Galdakaon, 473; eta Ibai Amillategik Getxon, 470,5. Finalaurrekoen lehen bueltan hamazortzi bertsolari ariko dira bertsotan: aipatutako bi horiez gain, gainontzeko hiru saioetako irabazleak ere sailkatu dira, baita puntuazio altuena lortu duten beste sei bertsolariak ere. Gainontzeko zazpi bertsolariak 2023ko finalistak dira.

Dagoeneko bost saio jokatu dira txapelketan, osatu da lehen fasea. Irune Basagoitiz eta Ibai Amillategiz gain, beste hiru bertsolari hauek sailkatu dira zuzenean, euren saioa irabazita: Aitor Bizkarra, Txaber Altube eta Unai Mendiburu. Gainontzeko sei sailkatuek puntuazioz lortu dute finalaurrekoetarako txartela; 452 puntuetan utzi dute sailkapenerako langa.

Hori horrela, urriaren 26an hasiko dira Bizkaiko Bertsolari Txapelketako finalaurrekoetako lehen bueltako saioak, Zeanurin. Bertan, sei bertsolari hauek ariko dira bertsotan: Aissa Intxausti, Aitor Bizkarra, Bittor Altube, Imanol Uria, Jone Uria eta Oihana Bartra. Bigarren saioan, Abadiñon, azaroaren 2an, beste sei bertsolari hauek izango dira: Aitor Etxebarriazarraga, Gorka Pagonabarraga, Enare Muniategi, Maite Sarasola, Txaber Altube eta Unai Mendiburu. Eta azken saioa Barakaldon izango da, azaroaren 9an, sei bertsolari hauekin: Ibai Amillategi, Irune Basagoiti, Lurdes Ondaro, Mikel Goiriena, Onintza Enbeita eta Xabat Galletebeitia.

Hiru finalaurreko horietatik hamabi bertsolari sailkatuko dira finalaurrekoen bigarren bueltara, azaroaren 15ean Bermeon eta azaroaren 22an Markina-Xemeinen. Azken saio horretan jakingo da zein zortzi bertsolari sailkatuko diren Bizkaiko Bertsolari Txapelketako finalera: abenduaren 20an Bilboko La Casillan. Sarrerak eskuragai daude bertsosarrerak.eus atarian.