Aurrez Katalunian, Aragoin edota Errioxan ikusitakoaren ildotik, Espainiako Vueltaren aurkako jarrerak segida izan du Nafarroan, astearte honetako etapan. Yala Nafarroak eta BDZ Nafarroak deituriko protesta baketsuei erantzunez, milaka zalek ikur palestinarrak astindu dituzte ibilbidean zehar eta “Stop genocide”, “Israel hiltzailea” eta “Free Palestine” gisako pintaketak egin dituzte errepidean.

Presentzia polizial handiko ibilbidean, Israel-Premier Tech txirrindulari taldea babes polizial berezia izaten ari da. Tentsio unerik handienak Irunberrin jazo dira: hainbat lagun errepidea mozten saiatu dira, baina Foru Poliziak eta Guardia Zibilak esku hartu dute, baztertu egin dituzte eta gutxienez bi pertsona identifikatu dituzte.

Bizkaian ere boikotera deitu dute

Bilbo-Bilbo asteazken honetako etaparako ere, boikota dago deituta. Gernika-Palestinatik salatu dute Premier Tech txirrindulari taldeak “Israelgo Estatuaren enbaxadore” gisa hartzen duela bere burua, eta hortaz, “estatu genozida baten enbaxadoreak” direla. UCI eta Vueltaren antolatzaileak salatzen dituzte, talde israeldarrari parte hartzen uzteagatik.

Bermeoko Udalak ere dei egin die biztanleei, Vuelta herritik pasatzen denean Palestinarekiko elkartasuna adieraztera eta genozidioa salatzera, Palestinako ikurrak eramanez.

Bestalde, ostegun honetarako kazerolada deitua du Gernika-Palestinak, Euskal Herriko udaletxeen aurrean, 19:00etan. “Genozidioa lehenbailehen amaitu dadin” urratsak emateko eskatu dute.

Ahotsa.info-k bideoan jaso du hamargarren etapa:

���� #PalestinaLibre #FueraIsraelDeLaVuelta
Así recibió Nafarroa al equipo israelí de #LaVuelta25 para denunciar el genocidio en #Gaza pic.twitter.com/Vuc9X72hQ5

— Ahotsa.info (@AhotsaInfo) September 3, 2025