El Periódico agerkariak eman du albistearen berri. Kasazio-errekurtsoa atzera bota du Auzitegi Gorenak. 2016ko maiatzean, Kordobako Pozoblanco herrian (Espainiar Estatua) neska gazte bati sexu abusuak egin izanagatik epaitu zituzten lau gizonak. Errekurtsoak eskatzen zuen baliogabe uzteko sexu abusuak eta intimitatearen aurkako delitua egotzita ezarritako zigorra.

Ez da hala gertatu. Zigorra irmoa denez, horietako hiru kidek bi urte eta hamar hilabeteko kartzela zigorra bete beharko dute eta batek, Jose Angel Prendak, lau urte eta erdikoa.

Kordobako neskari auto barruan konorterik gabe zegoela sexu abusuak egin zizkioten eta bi bideo grabatu zituzten. Bideoak Guerreroren telefonoan aurkitu zituzten Iruñeko talde bortxaketaren harira ikertzen ari zirela. Kordobako neskari sexu abusuak egin eta bi hilabetera bortxatu zuten Iruñeko Sanferminetan beste emakume gazte bat. Bigarren kasu horregatik ari dira hamabost urteko espetxe zigorra betetzen.