“Gainerako zinemaldietara egokitu nahian”, sariak emateko modua aldatu dute aurtengo deialdian: Zuzendaritza, Ekoizpena, Gidoia, Argazkia eta Film Onena sarituko dituzte. Profesionalen artean, sari bakoitza irabazten duenak 1620 euro eta zilarrezko antzarra irabaziko ditu; amateurrei dagokienez, 1100 euro eta antzarra. Horrez gain, hasiberrientzako sari berezia ere izango da: 1991ko urtarrilaren 1a baino beranduago jaiotako parte hartzaileen artean lan onena aurkezten duenari 600 euroko saria emango zaio.

Bi helburu nagusi ditu Euskal Zine Bilerak: “Lan amateurrak saritu eta bidea egiten laguntzea; eta euskarazko zimenagintza profesionalaren bilgune izatea”. Lanak Lekeitioko Kultur Etxera bidali behar dira. Informazio gehiago dago ikusgai Zine Bileraren webgunean. Iker Ayestaran ilustratzaileak egingo du edizio honetako kartela.