Ezker Anitza-IU, EQUO-Berdeak eta Independenteez osatutako koalizioak, Barakaldon antolatuko diren ekintzen gaineko "benetako eta unean-uneko informazioa" eman dezala esan dio Udalari. Irabaziko bozeramaileak salatu du oposizioko taldeek eta auzo zein dendari elkarteek informazioa "tantaka eta prentsaren bitartez" jaso dutela. "Gobernu taldeak segurtasun-neurriak prentsari aditzera eman dizkio elkarteei eta oposizioari jakinarazi baino lehen", adierazi du Eder Alvarezek. Horrexegatik beragatik eta EAJren gelditasuna dela-eta, oposizioko alderdiek, elkarrekin adostuta, informazio batzordea egitera behartu diote gobernu taldeari azalpenak eman ditzan.

"EAJk gehiegikeria eta zarrastelkeria hutsean bihurtu ditu MTV-EMArekin zerikusia duten ekintza guztiak" esan du Alvarezek. Gogorarazi du Irabazik igandean dagoeneko salatu zuela Udalak 220.000€ emango dizkiola MTVko ekintzei, "auzoek jaiak ospatzeko urtean jasotzen dutenaren bikoitza".

Irabaziko bozeramaileak esan du Barakaldoko EAJk "gure udalerria konpartsakide bihurtu duela Herriko Plazan kontzertu garesti baten truke". "Barakaldok 220.000€ baino gehiago ordainduko du garbiketan, polizia operatiboan eta era guztietako eragozpenetan", gaineratu du Alvarezek.

Albiste hau Herrikolorek bere webgunean argitaratu du eta CC-BY-SA lizentziari esker ekarri dugu ARGIAra.