Astelehenean epaitu dute Aintzane Mendia, 2021eko ekainaren 17an Amurrioko epaitegien aurrean jazotako gertakarien harira. Ordurako lau hilabete zeramatzaten greban Tubacexeko langileek, eta auzipetutako zenbait lankide epaitegietara deituak zeuden egun horretarako. Lankideei elkartasuna adieraztera gerturatuak ziren hainbat grebalari, eta Poliziaren eta langileen artean giroa nola tenkatu zen kontatu dio Naiz-i Mendiak: "Lasai geunden. Elkarrekin hitz egiten, behin lankideak epaitegira sartu zirela. Bat-batean Ertzaintza etorri eta gure aurka hasi zen. Noraino atzeratu behar ginen ezarri zuten. Hori bete arren, bultzaka hasi ziren indarkeriaz". Ertzaintzaren oldarraldiaren ondotik identifikatu eta atxilo eraman zuten Mendia, eta LAB sindikatuak salatu du lesioak eragin zizkiotela modu bortitzean eramateagatik. Hamabost hilabeteko espetxe zigorra eskatzen diote orain, autoritatearen aurkako atentatua leporatuta.

"Ertzaintzaren istiluen aurkako agente batek leporatzen dit paparrean ukabilkada jo izana. Sinesten gaitza da, kontutan izanik baldintzak eta jantzita eramaten dituzten ezkutu babesleak", azaldu dio auzipetuak El Salto-ri. Mendiak itzulingururik gabe salatu du bere aurka abiatutako prozesu judiziala langile klasearen aurkako enegarren muntaia poliziala dela: "Ez naiz muntaia polizial baten biktima izan den langile bakarra, ez naiz izan lehena, eta ez naiz izango azkena. Honakoa langile klasearen aurkako beste muntaia polizial bat da; dena pairatu behar duen klasea gara, covid-etik hasi eta gerraraino, goikoak beti bezala edo lehen baino hobeto bizi diren bitartean".

Iritzi berekoa da LAB sindikatua, publiko egindako idatzian adierazi baitu Mendiari leporatzen dizkioten gertakariak "beste muntaia judizial" bat direla, "Tubacexeko grebatik sortutako elkartasun guztia kriminalizatzeko". Sindikatuak Tubacexeko langileen aurkako kriminalizazio-estrategia zabalago baten baitan kokatu du Mendiaren kasua, zeinaren helburua litzatekeen "Greban aktiboki parte hartu zutenak eta euren lanpostuak defendatzeko eskubidea erabili zutenak zapaltzea". Kriminalizazioaren munta islatzeko, Tubacexeko grebalariek pairatu duten errepresioaren gaineko zifrak eman ditu: 25 langilek baino gehiagok jaso dituzte isunak eta inputazioak, 25.000 euro baino gehiago ordaindu behar izan dituzte isunetan –600 eta 3.000 euro arteko isunak jaso dituzte–, eta zazpi pertsonaren aurkako espetxe-eskaerak egin dituzte.

"Jasaten ari garen jazarpen guztiekin errepresioaren mezua bidali nahi badute ere, guk oso argi daukagu: langileen borroka kriminalizatzen saiatu arren, gure lanpostuen eta lan-eskubideen alde borrokatzea ez da delitua. Errepresio guztiaren aurrean: batasuna eta elkartasuna. Tubacexeko grebarekin langileok egiaztatu ahal izan genuen bezala, bidegabekerien aurrean langileen borroka da bide bakarra", adierazi du LABek. Zentzu horretan, mobilizazioa deitu du astelehen goizean Arabako Probintzia Auzitegiaren aurrean, Mendiari elkartasuna adierazteko, eta beronen absoluzioa exijituz.