Emakumeak borrokan

Huerta de Peralta enpresak ostiralean erantzungo die greban dauden langileei

  • Atzo eguerdian izan zuten bilera enpresarekin. Kaleratutako zortzi langileak berronartzea eta azken hilabeteotan ezarritako zigorrak atzera botatzea eskatzen dute grebalariek.

Gorka Pe˝agarikano Goikoetxea @gorkap34
2019ko urtarrilaren 03a

Gaurkoarekin bederatzigarren greba eguna dute Azkoien herrian dagoen Huerta de Peraltako langileek. Abenduaren 26an ekin zieten lanuzteei, eta atzo, lehen aldiz, enpresaren zuzendaritzako goi-karguekin bildu ziren langileen ordezkariak. Kaleratutako zortzi langileak berronartzea, azken hilabeteotan ezarritako zigorrak bertan behera geratzea eta grebalarien aurkako neurririk ez hartzea eskatzen dute langileek. Era berean, langileei zor zaien diru kopurua nola banatu proposatu du greba batzordeak, eta, bestalde, negoziazio prozesu bati ekiteko konpromisoa eskatu dio enpresari.

Iazko irailean, langile batzordea eratzeko hauteskundeetan, LABen izenean aurkeztutako migratzaile marokoarrek lortu zituzten jokoan ziren bederatzi ordezkarietatik sei, Euskalerria Irratiak jaso zuenez. Orduz geroztik, lan baldintzek nabarmen egin dute hobera: lanaldien murriztapena esanguratsua izan da, eta kontratu batzuk finko bihurtu dira. Baina, tarte horretan, Huerta de Peralta enpresak LABekin lotura zuten lau behargin kaleratu ditu.

Lehen mobilizazio egunean, abenduaren 26an, Foruzaingoak esku hartu eta zaurituak izan ziren.

Mobilizazioak

Enpresaren erantzunaren zain, langileek greba mugagabearekin eta aurreikusitako mobilizazioekin jarraituko dute. Gaur, ostegunean, nazioarteko sindikatuen hainbat ordezkari Azkoienen izango dira, grebalariei euren babesa erakuste aldera –Kataluniako IAC, Aragoiko CUT, Asturiaseko CSI, Intersindical Valenciana eta Frantziako Estatuko Solidaires–.

Bihar bestalde, ostiralean, Elkartasun Eguna deitu dute Azkoienen. 12:00etan manifestazioa egingo dute, enpresaren partetik erantzuna jasotzeko egun berean. Eta azkenik, momentuz, datorren urtarrilaren 7an, astelehenean, manifestazioa egingo dute Iruñean, 12:30ean Udaletxe Plazatik irtenda.

 

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Langile borroka  |  Nafarroa

Langile borroka kanaletik interesatuko zaizu...
Azkenak
EGILEA
Eguneraketa berriak daude