Itunpeko ikastetxeetara 8,4 milioi euro bideratuko ditu EAEko Hezkuntza Sailak
Itunpeko ikastetxeek enplegua mantendu edo irakasle-plantillak errelebo-kontratuen bidez gaztetu ditzaten diru-laguntzak eskainiko ditu Eusko Jaurlaritzako Hezkuntza Sailak. Aurtengo urte hasieran ikastetxeetako patronalarekin eta sindikatuekin sinatutako itun baten ondorioz hartu dute erabakia: "Enplegua mantentzea eta belaunaldi-erreleboa egitea" ahalbidetuko zutela sinatu zuten.
Euskal Autonomia Erkidegoko itunpeko irakaskuntzako Haur Hezkuntzako bigarren zikloko, Lehen Hezkuntzako, Derrigorrezko Bigarren Hezkuntzako, Batxilergoko edo Lanbide Heziketako kontratu mugagabea duten irakasleak izango dira onuradunak.
2020-2021 ikasturtean itundutako ikasgelak murrizteak irakasleak kaleratzea ekarriko duela jakitun, irakasle horiek zentroan “birkokatzea” proposatzen du Hezkuntza Sailak, eta hori posible ez den kasuetan kalte-ordainak akordioan ikusita dagoen bezala ordaintzea. Horrez gain, plantillak gaztetzea ere proposatu du, errelebo-kontratuak bultzatuz.
