Haurren kontrako indarkeria patriarkala salatu dute igandean egindako manifestazioarekin, ez dela begiak ixteko garaia azpimarratuz. Itsutasunaren kontra, plataformak datuak eman ditu: hamahiru urte bete baino lehen, lau neskatotik batek eta zazpi mutikotik batek sexu erasoak jasaten ditu. Kasuen %90ean, gainera, erasotzailea familiako kidea izan ohi da. Egoera hau izanik, arazoaren kontra lan egiteko deia zabaldu diote jendarteari.  

Save The Children GKEak argitaratutako informe baten arabera, EAE mailan, adin txikikoen kontrako sexu erasoen %90a ez da ahozko epaiketa batetara heltzen, aurretik artxibatzen direlako. Datu honen arabera, auzibidean dauden sexu eraso kasu gutxien dituen autonomia erkidegoa da EAE. Erakundetik diotenez, biktimari ez sinesteko joera dago. Honen aurrean, plataformak aldarri garbia egin du: adituen txostenen babesa jaso arren artxibatuak izan diren kasu guztiak berriz zabaltzea.