ARGIA.eus

2021eko maiatzaren 09a

Gutun irekia Eneko Goia alkateari


Piztu Donostia @PiztuD
2021eko apirilaren 19a

Mozal hiriari ez! lemarekin, joan den 2020ko otsailaren 1ean, Piztu Donostia Plataformak Donostiako Udaltzaingoaren bulego aurrean egin zuen kontzentrazioan, bertako zuzendariari Piztu Donostia, mozal hiriari EZ! izena duen zazpi puntuko dokumentua bidali genion erregistro bidez. Bide beretik, Donostiako Udaltzaingoaren arduradun politiko nagusia zarenez, dokumentu horren kopia zuri ere bidali genizun. Egia esan, ohikoa den moduan, ez genuen inoren erantzunik jaso.

Duela urtebete Donostiako Udaltzaingoaren bulegoen aurrean egin genuen kontzentrazio hartan Udaltzaingoak gero eta maizago bereganatzen duen ekinbide errepresiboa, eta zenbait kasutan baita politikoa ere, salatu genuen, Euskal Legebiltzarrak salatu duen Mozal Legea behin eta berriro aplikatu baitu eragile eta militante sozial, sindikal eta politikoen aurka. Horregatik jarri genion kanpainari Mozal hiriari ez! izenburua.

"Normala al da bizikletan aurikularrak jarrita zituelako mugikortasun agenteek geldiarazi zuten adin txikikoa Udaltzaingoak oso bortizki atxilotzea, eta polizia-etxean kolpaturik bukatu duela salatzea?"

Kanpaina honi “bai” esan genion hogeiren bat eragile sozial, sindikal eta politikoek zera adierazi genizuen hitzez hitz, gure defentsan zazpi puntu azpimarratu ondoren: "Piztu Donostia, mozal hiriari EZ! ekimenarekin bat egiten dugun, pertsona zein eragile guztiok dei egiten diogu Udaltzaingoari gure eskubideak errespeta ditzan”.

Tamalez, urtebete ondoren, Piztu Donostia Plataformaren eskubideen behatokia gertakari larri bat salatu beharrean dago, duela hamar bat egun hiru udaltzain Amarako Easo Plazan adin txikiko bat atxilotzeko erakutsitako jarrera eta erabilitako teknika ez baitatoz bat, inola ere, Donostiako Udaltzaingoak bere jardueran bermatu behar dituen oinarrizko eskubide sozial, zibil eta politikoekin.

Amarako Easo Plazan ikusi dugun –eta filmatua dagoen– Udaltzaingoaren atxiloketak, 2020ko uztailaren 16an AEBetako Minnesotan George Floyden heriotza ekarri zuen atxiloketa dakarkigu gogora. Easo Plazan, pertsona bat lurrean hiru polizia gainean zituela eta arnasa hartzerik ez zuela garrasika… Nahikoa ez eta esku burdinak jarrita kotxean zeramatela behin eta berriro kolpatua izan zela salatu zuen adin txikikoak. Normala al da bizikletan aurikularrak jarrita zituelako mugikortasun agenteek geldiarazi zuten adin txikikoa Udaltzaingoak oso bortizki atxilotzea, eta polizia-etxean kolpaturik bukatu duela salatzea? Inork ez al du gehiegikeria polizial hau salatu behar?

Gutun honen bidez lau eskaera egin nahi dizkiogu Eneko Goia Alkateari:

1.- Udaltzaingoak edozein herritarri zor zaizkion eskubide sozial, zibil eta politikoak errespetatuz joka dezan, behar diren neurriak har ditzala eskatzen diogu Alkateari.

2.- Easo Plazako gertakarien inguruan informazio espediente bat zabal dezala eta ikerketaren emaitzak publiko egin ditzala, hiru udaltzainen jokabidea zuzena izan den ala ez jakiteko.

3.- Gardentasunaren izenean, Alkateak publiko egin ditzala Udaltzaingoak bere jarduerarako finkaturik dituen protokoloak, etorkizunean herritarrok argi eta garbi jakin dezagun non dauden Udaltzaingoak bere jardueran errespetatu behar dituen mugak.

4.- Udaltzaingoaren funtzio nagusia herritarrak laguntzea da eta ez errepresio lanetan aritzea. Easo Plazako gertakizunek Udaltzaingoaren aurrean herritarren beldurtzea dakar eta beldurtzen duenak ez du laguntzerik.

Eskubideen Behatokiaren eskaera hau indartzeko asmoz, Piztu Donostia Plataformak Bulebarrean, Udaletxeko balkoiaren azpian, ordu erdiko kontzentrazioa antolatu du, herritar zein eragile guztiek gertatutakoa salatzeko aukera izan dezaten.

Eneko Goiak entzungo gaitu!

Bidali zure iritzi artikuluak iritzia@argia.eus helbide elektronikora
ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Iritzia  |  Donostia  |  Polizia gehiegikeria

Iritzia kanaletik interesatuko zaizu...

Azkenak EGILEA
Argia buletina
Egunaren laburpena
zure e-postan
Eguneraketa berriak daude