Urriaren 31rako 300.000 euro lortu nahi ditu kooperatibak eta abenduaren 31rako milioi bat euro.

Bazkide guztiei bidali dien gutunean esaten duenez, azken hilabeteetako gertaerek diruzaintzan zuzeneko eragina izan dute eta epe laburrean aparteko desorekak sortu dituzte.

Hiru arrazoi azpimarratu dituzte egoera horretara iristeko. Lehenik, argindarraren prezioa asko igo da hilabete batzuetan, maiatzean 67 euro/MWh zen eta irailean 165 euro/Mwh. Bigarrenik, merkatu elektrikoan berme mekanismoak daude ezarrita erabiliko den energia ordaintzeko diru nahikoa izango dela ziurtatzeko. Goienerrek adierazi du prezioen igoeraren ondorioz, likidazioez gain, eskudirutan jarri beharreko bermeak ere izugarri handitu zaizkiela. Hirugarrenik, ekainaz geroztik bazkide gehienen fakturetan %10eko BEZa ari dira aplikatzen Espainiako Gobernuak hala agindu dielako, eta aldiz, erosketak %21eko BEZa du. Goienerrek Ogasunari eskatu dio BEZa itzultzeko eta sail horrek sei hilabeteko tartea du itzulpena egiteko.

Egoera presazkoa eta larria dela adierazi du kooperatibak eta bazkideei 50 eurotik gorako borondatezko ekarpenak egiteko eskatu die.

Lasaitasun mezua bidali die bazkideei. Urteko emaitzen kontuak aurreikuspenen araberakoa izaten segitzen duela dio kooperatibak eta azpimarratu nahi izan du araudi aldaketak eta merkatuko egoera koiunturalak baldintzatuta datorrela likidezia egoera.