Naiz.eus hedabideak eman du albistearen berri. Ipar Euskal Herriko elkarteak ezohiko biltzar nagusia egin du otsailaren 22an, larunbatez, eta bilkura horretan azaleratu da azkenaldian Eusko Ikaskuntzaren barruan dagoen gobernantza krisia. Virgil Joseph-Alexandre Antropologiako ikaslea da gaur egun Ipar Euskal Herriko egiturako lehendakaria. Urtarrilaren 29an, administrazio kontseiluak egin zuen bilkuran, kargutik kendu zuten Claude Mehats, 2023an aukeratutako lehendakaria. Administrazio kontseiluko kideen erdiek eman zuten lehendakari berriaren aldeko bozka.

Eusko Ikaskuntzak adierazi du erakundearen marka eta Baionako egoitza ezingo dituztela erabili. Bigarren horren harira, salaketa jarri berri du, erakundeak aldatua zuen egoitzako sarraila bertako langileak ostiralean puskatu eta barrura sartu zelako.

Naiz.eus-ek dioenez, bi aldeen prentsa-oharrak kontuan hartuta, hilabetetako tira-birak izan dituzte erakundean, eta arazo nagusia gobernantza da, nahiz eta estrategian eta langileen kudeaketan ere iritzi desberdinak dituzten.

Larunbateko ezohiko biltzar nagusian zuzendaritza batzorde berria izendatu dute eta jakinarazi dute Hego Euskal Herriko zuzendaritzarekin batera lan egingo dutela, beti ere lehendakaria aukeratzeko autonomia aldarrikatuta.

Berria-k ere, Eusko Ikaskuntzako Ana Urkiza lehendakariak eta Iñaki Zabaleta idazkari nagusiak izenpetutako dokumentuari egin dio erreferentzia. Agiri horretan adierazi dutenez, Baionako elkarteak bere jardunean “noraezak” eduki ditu eta eragindako “ondoezek” elkartea “kinka larrian” utzi dute. Iragarri dute bilerak antolatuko dituztela, bi egituren arteko elkarlanerako hitzarmen berri bat adostu ahal izateko.