Zero Zabor blogean jaso dugu Errausketaren Aurkako Mugimenduak abenduaren 27ko manifestazioan irakurritako mezuak. Lotura honetan ikusi ahal dituzue.

Mobilizazio oso jendetsua egin da astearte eguerdian Donostian. Dani Blanco ARGIAko kazetariak honela bildu du bertan ikusitakoa:

Milaka lagun bildu dira Donostian Zubietako erraustegiaren lizitazioaren aurrean protesta egiteko. Gipuzkoa Plaza jendez lepo bete da astearte buruzuri batez. Markel Olano diputatu nagusiak "entzungo ditugu protestak" onartu du, esleipena iragartzeko unean.

Jendeak txistu eta burrunbaz hartu du GHK-ren erabakia. Antolatzaileek, Errausketaren Aurkako Mugimenduak, testu bana irakurri dute martxaren hasieran eta amaieran. Erraustegiaren kontra duela 14 urtetik hona izandako mugimenduaren eta azken urteetan sorturiko alternatiben inguruan mintzatu dira lehenbizi: "Duela ia zortzi urte ekaitz haren erdian atez ateko bilketa abian jartzeko ausardia izan zuten udal haiei, hautetsiei eta herritarrei gure eskerrak eman nahi dizkiegu: Usurbil, Hernani, Oiartzun, Oñati, Antzuola, Orendain eta  abarri. Gure eskerra ere gaikako beste sistema benetan ondo kontrolatuekin aurrerapen handiak lortu dituzten beste udalei", esan dute txalo zaparrrada artean.

Ingurumenari eta osasunari egingo dio kaltea gogoratzeaz gain, lizitazioak ekonomikoki Gipuzkoako herriei zer suposatuko dien nabarmendu dute irakurritako testuan: "35 urtez udalak eta herritarrok zorpetuko gaituen zor ilegitimoa salatu nahi dugu. Herritarrak ohartarazi behar ditugu lapurreta honetaz, nolaz erraustegia egiten badute, beren osasunaz eta ingurumenaz gain  jendarte osoak nozituko dituela ondorioak, klase guztietako zerbitzu sozialen murrizketekin", azaldu dute.

Martxaren amaieran irakurritako beste testuan aldarrikapen sendoa egin dute errausketaren kontra eta hondakinen kudeaketa zentzuzko baten alde  "aurrera jarraitzeko". Udal agintariei euren subiranotasuna "zorrotz" defenda dezatela eskatu diete "eskumenak esku pribatuetan utzi gabe".

Aferak oraindik soka luzea izango duela zalantzarik ez izateko esaldi batekin amaitu du hizlariak: " Aurrera jarraituko dugu Gipuzkoako herritarrok erraustegi kriminal hau gelditu arte".

GHK-k Urbaser enpresaren eskuetan utzi du gipuzkoarren hondakinak erre eta kudeatzeko eskumena eta 768 milioi euro ordainduko diete herritarrek horretarako. 

Markel Olano eta Jose Ignacio Asensiok eman dute erabakiaren berri prentsaurrean: "Egingo genuela esan genuen eta ondo egingo dugu", azaldu du Olanok. Egun garrantzitsutzat jo dute gaurkoa, haien esanetan "irtenbide honek konpondu egiten ditu Gipuzkoarren beharrak".

GuraSOSek parte-hartzearen inguruan Donostiako instrukzio epaitegian jarritako helegiteaz galdetuta, Jose Ignacio Asensio diputatuak "Gipuzkoak ezin du itxaron" erantzun du.

Hala, erraustegiaren esleipena zihurgabetasun egoeran dago momentu honetan, auzitegian parte-hartzearen eta Eusko Jaualritzaren Ingurumen baimenaren inguruan hainbat erabaki hartu beharko baitira. Hala ere lanak lizitatu egin dira eta GHK-ko agintariek auzitegiei itxaron gabe abenduaren 27 honetan hartutako erabakiak ondorio larriak izan ditzake balizko kalte-ordainei dagokienez.

Hasi da erraustegiaren kontrako bilkura Donostian, Gipuzkoa Plazan. Eguerdiko 12:00ak jo bezain pronto txistuekin eta soinu handia eginez ekin diote mobilizazioari. Errausketaren kontrako mediku taldeari, aldiz, txalo zaparrada jo diote bertaratutakoek. Mobilizazioaren hasieran eta amaieran testu bana irakurriko dute antolatzaileek.

Errausketaren aurkako elkarretaratzean gaude @OrainGipuzkoa aurrean! #errausketarikEZ #osasunaBai pic.twitter.com/cJokXRiHWF

— Greenpeace Euskadi (@GreenpeaceEUS) 2016(e)ko abenduak 27

Mediku taldeari txalo zaparrada osasun kalteez informatu dutelako #errausketarikez #a27zorbidegabea pic.twitter.com/MdyJ63XSfR

— ARGIA (@argia) 2016(e)ko abenduak 27

12:00ak puntuan jendea Aldundiaren aurrean txistuka eta #errausketarikez oihuka. pic.twitter.com/cMog3eBweL

— Lander Arbelaitz (@larbelaitz) 2016(e)ko abenduak 27

Gipuzkoa plaza bete-beteta errausketari EZ esateko. Llenazo en la pza. Gipuzkoa para decir NO a la incineradora pic.twitter.com/5rReUIitYy

— Juantxo Iturria (@juantxo_iturria) 2016(e)ko abenduak 27

Gurasosek elkarteak prentsaurrekoa eman du gaur goizean Donostiako Kaxilda liburudendan. Bere ordezkariek "harridura" azaldu dute, Donostiako Instrukzio epaitegiak beranduenez gaur goizean eman behar baitzuen Zubietako erraustegiaren inguruan GuraSOSek jarritako helegite baten inguruko ebazpena, baina oraindik ez du horrela egin.

Harrituta epaitegiarekin eta penatuta GHKrekin, baina lanean jarraituko dugu gogoz: gaur ez da ezer bukatu #GURASOS Argazkia: @noaua pic.twitter.com/6kJRuQ8yET

— gurasos (@tgurasos) 2016(e)ko abenduak 27

Abenduaren 27an Gipuzkoako erakunde nagusiak kontrolatzen dituzten EAJ eta PSEko agintariek urrats berri eta –2011an nahi izan zuten bezala– atzerabiderik gabekoa egingo dute aspaldi erabakitako errauste planta Zubietan eraikitzeko bidean. Aste hauetan gauza asko daude jokoan Gipuzkoan eta egunotan egindako edo egin gabe lagatako ekintzek ondorioak ekarriko dituzte gutxienez 2051 arte. Hona gakoetako batzuk, nire ustean:

[Pello zubiriaren analisia irakurtzeko sartu hemen: http://www.argia.eus/blogak/pello-zubiria/2016/12/22/erraustegia-asteotan-jokatzen-denaz-14-gako-eta-galdera/

Abenduaren 27an erraustegiaren aurka mobilizatzeko deia egin du Donostian Erraustegiaren Aurkako Mugimenduak. Eguerdiko hamabietan izango da mobilizazioa, proiektua “eztabaida publikorik gabe inposatzen” ari direla salatzeko.

Irakurri albistea osoa hemen: http://www.argia.eus/albistea/erraustegiaren-aurkako-mobilizazioak-epaitegien-erantzuna-iritsi-zain