ARGIA.eus

2020ko abuztuaren 11

Kartzelatik atera da Josu Urrutikoetxea

  • Bezperan, hau da, uztailaren 29an baieztatu zuen presoa libre uzteko erabakia Parisko Dei Auzitegiko instrukzio ganberako epaileak. Hainbat baldintza bete beharko ditu, besteak beste, eskumuturreko telematikoa eraman beharko du bai ala bai.

Jenofa Berhokoirigoin @Jenofa_B
2020ko uztailaren 30a
Parisko Dei Auzitegia

10:30 aldera atera da Parisko La Santé presondegitik Josu Urrutikoetxea preso politikoa, bezperan uztailaren 29an Parisko Dei Auzitegiko instrukzio ganberako epaileak erabakia baieztaturik. Baldintza batzuk bete beharko ditu ordea eta ez da osoki libre izanen: eskumuturreko telematiko bat eraman beharko du; Paris erdiguneko etxe bat izanen du obligaziozko bizileku; ordutegi zehatza errespetatu beharko du –astean zehar 10:00etatik 12:00etara eta 15:00etatik 20:00etara ateratzen ahalko da bizilekutik, eta asteburuetan 10:00etatik 16:00etara–; eta ezingo du Frantziako Estatuaren menpe diren lurretatik atera.

Bertan egon da Ekhi Erremundegi BERRIAko kazetaria eta ateratzearen bideoa zabaldu du sare sozialetan:

Dei Auzitegia uztailaren 1ean agertu zen Urrutikoetxea eskumuturreko telematikoa ezarrita aske uztearen alde eta erabaki hau berretsi zuen atzo Dei Auzitegiko instrukzio ganberako epaileak. Hain zuzen, kartzelako zuzendaritza ere hilabete hastapeneko deliberoaren alde kokaturik, erabakia berretsi zuen atzo epaileak.

Bost auzi zabalik

Bost auzi ditu zabalik Frantziako Estatuan: Frantziaren bi epaiketa, baita Espainiaren bi estradizio eskaera eta euroagindu eskaera bat ere –uztailaren 1ean Parisek atzera bota zuen euroagindu eskaera bat–. Laurent Pasquet-Marinacce defentsa abokatuak argi du: "Ikonoa da, ETAk armak uztearen izandako paperagatik. Horrek azaltzen du Espainiaren gogoa. Eskaera herrenak dira, ez dira oinarrituak". Parisek jarritako auzien artean, ETAko zuzendaritzako kidea izatea egotzita, 2011-2013. urteetan Oslon elkarrizketa mahaian ETAren ordezkaritzako kidea izatea leporatzen diote.

Defentsaren partetik zein elkartasun sareen aldetik, behin baino gehiagotan azpimarratua izan da Urrutikoetxeak bake prozesuaren gauzapenean ukandako papera. Presoa askatzeko deiak entzun ahal izan dira behin baino gehiagotan, tartean apirilean nazioarteko 180 bat eragilek egindako gutun bidez. "Josu Urrutikoetxea kartzelan edukita oso mezu txarra igortzen die Frantziak munduko bake prozesuei" adierazi zuten manifestuan.

Osasunez larri dabil Urrutikoetxea eta giza eskubideen errespetuan oinarriturik, horregatik ere nahi zuten libre. Oroit gara 2019an atxilotu zutenean, ospitale batera zihoala ebakuntza egitera.

2019ko maiatzaren 16an atxilotu zuten Frantziako Alpeetan. Orain arte, behin baino gehiagotan ukatua izan zitzaion askapen eskaria. Iazko ekainaren 19an onartu zitzaion, baina azkenean Espainiako Estatuaren eskariz, berriz ere atxilotu eta preso sartu zuten. Uztailaren 30 honetan aterako da La Santé kartzelatik.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Euskal preso politikoak  |  Euskal gatazka  |  Paris

Euskal preso politikoak kanaletik interesatuko zaizu...

Azkenak
EGILEA
Argia buletina
Egunaren laburpena
zure e-postan
Eguneraketa berriak daude