40 urteko ibilbidea duen txosnaguneari etenaldi bat egokitu zaio aurten. Uztailaren 24an Florida parkean egindako agerraldian azaldu dute erabaki zaila izan dela, baina argi dute 2021ean indarberrituta itzuliko direla: "Kalea garelako eta kalean garelako", aukeratu duten leloak dioen bezala.

Amaiur Arbe eta Jon Ander Elosegi Gasteizko Txosna Batzordeko kideek pandemiaren eragina, jai herrikoien etorkizun hurbila, atzerapenarekin ospatuko den urteurrena, Udalarekin egindako bilerak edota espazio publikoaren erabilera izan dituzte hizpide ALEArekin izandako solasaldian.

Zergatik erabaki zenuten txosnaguneari etenaldi bat ematea?

Amaiur Arbe: Konfinamenduan zehar telematikoki elkartzen joan ginen, hasiera batetik kezka nabaria zelako. Etxean geunden eta argi zegoen gure jarduna aldatu beharko genuela. Hortaz, hasierako asmoa jaiak birpentsatzea eta beste modu batean antolatzea zen, baina osasun egoerak erabat baldintzatu du erabakia. Zailena izan da 40. urteurrena izan behar zen honetan dena bertan behera utzi behar izatea; bai urtemuga bera, baita jaiak, txosnak eta bestelako ekimen guztiak ere.

Orduan, zer gertatuko da urteurrenarekin?

Jon Ander Elosegi: 40. urteurrena 2020ko lehenengo zatian ospatu behar zen, eta, jakina, bertan behera geratu da. Hala ere, gure asmoa aurten ospatzea da, eta 2020/2021 ikasturterako utzi dugu, oraingoz; egoeraren arabera moldatu beharko gara, baina hainbat ekintza antolatuko ditugu, gehienbat urtarriletik aurrera.

Nolakoak izan dira Gasteizko Udalarekin izandako bilerak?

J.A.E: Guzti hau hasi zenetik saiatu ginen Udalarekin harremanetan jartzen, jakiteko zer nolako erabakia hartuko zuten. Proposatu genien gu, Gasteizko Txosnak bezala, bertan egotea, eta baita Neska eta Blusen Elkartea edota hiriko tabernariak ere. Bi hilabete egon ginen Udalaren atzean, eta ez genuen inolako erantzunik izan. Beti esaten zuten ez zekitela zer pasatuko zen, oraindik goiz zela, eta, momentuz, jaiak aurrera zihoazela.

A.A: Gero, maiatzaren hasieran, bilera bat lortu genuen Udalarekin, eta Gasteizko jaien inguruko mahai bat sortzea proposatu genien, eragile guztion artean aukerak aztertzeko, ea zer nolako jaiak egin ahal ziren eta nondik nora joan ahal ginen. Hasiera batetik ikusi genuen erantzukizuna kolektiboa izan behar zela; Udalarena baina baita Gasteizko jaiak osatzen ditugun eragile guztiona ere. Hortaz, ardura eta erabakiak kolektiboak izan behar ziren, eta gure iritzia hor egon behar zen.

Eta ez al da horrela izan?

J.A.E: Bilera bakarra egin dugu Udalarekin, eta gero posta bidez egon gara harremanetan. Guk argi utzi genuen minimo batzuk ezagutu behar genituela, jakiteko zer antolatu genezakeen eta zer ez; lanean hasi eta zerbait aurkeztu ostean atzera bota behar ez izateko. Udalak, gaur gaurkoz, ez dizkigu minimo horiek jakinarazi.

A.A: Orduan heldu zen momentua, ekainaren erdialdean: txosnagunerik ez zela jarriko erabakita zegoen jada, baina, gainera, erabaki genuen Gasteizko Txosnek aurten ez zutela inongo ekintza edo ekitaldirik antolatuko.

 

Ez al duzue uste espazio publikoaren erabilera murriztea ulergarria dela segurtasun arrazoiengatik?

A.A: Instituzioetatik erabilera baldintzatu da denbora guztian, baina ez dituzte irizpide argiak eman; espazio publiko horren erabilera ukatzera mugatu dira. Auzoetan, adibidez, baimena eskatu den bakoitzean atzera bota dute zuzenean. Ziurgabetasuna nagusitu da, baldintza horietan ezer antolatzea oso zaila da, eta, azkenean, ez da aukerarik egon ezer antolatzeko, saiakerak egon diren arren. Auzoetako jai batzordeak babesgabe sentitu dira, eta ardura guztia beraien bizkarrean jarri da, zerbait ilegala antolatzen ari balira bezala; ez da laguntzarik edo irizpiderik eman.

Aurreikusitako jardueraren bat salbatu duzue?

J.A.E: Uztailaren 24an Kalea gara, kalean gara kainpaina aurkezteko egin dugun prentsaurrekoaz gain, ekitaldi bakarra egingo dugu, eta jaien aurretik izango da. Ikasturte hasieran Banda Lehiaketa abiatu genuen, eta finala abuztuaren 3an ospatuko da, Jimmy Jazz aretoan.

2021ean 40 urteko ibilbidea eta Gasteizko jaiak ospatu ahal izango dituzuela uste duzue?

A.A: Momentuz dena airean dago. Ez dugu ezer aurreikusi, bizi dugun ezohiko egoera honetan ezinezkoa delako programazioan pentsatzen hastea. Egoeraren arabera eta egiten uzten digutenaren arabera gauzak planteatzen hasiko gara.

J.A.E: Hori bai, 2020ko programazio guztia itxita geneukan, eta, printzipioz, lotutakoa 2021era atzeratu ahal izatea nahiko genuke. Posible denean kristorena montatuko dugu 40. urtemugarekin. Gainera, urteurrenaren abestia sortzen ari gara dagoeneko.