Fiskaltzak Jakes Esnal eta Ion Parot preso mantentzea eskatu du beste behin
Ostegun honetan aztertu dute bi euskal presoen kasua Parisko Dei Auzitegian eta irailaren 22an emango dute erabakiaren berri. Bake Bideak salatu du "segurtasun ikuspegi soilak itsuturik" daudela magistratuak eta dei egin du uztailaren 23an egingo den blokeoan parte hartzera.
Espero bezala, Terrorismoaren Kontrako Fiskaltzak ez du iritziz aldatu eta Jakes Esnal eta Ion Parot preso lapurtarrak kartzelan mantentzea eskatu du berriz ere. Prokuradorearen jarrerak, behin eta berriz helegiteak jarriz bi euskal presoen askatasunari, eragin du euren kartzelaldia luzatzea –jadanik 32 urte daramatzate giltzapean–.
Esnalen auzia maiatzaren 19an berrikusi behar zuen Dei Auzitegiak, baina gaur arte atzeratu du data, Frantziako Ebaluzio Zentroaren iritzia ere jakin nahi zuelako. Ion Paroten kasuan ekainaren 16an baldintzapean askatzea erabaki zuen auzitegiak, baina horri ere helegitea jarri zion prokuradoreak.
Uztailaren 21 honetan zuten, hortaz, enegarren agerraldian magistratuen aurrean. Gauzak horrela, fiskaltzaren eskaria jakinda, irailaren 22an emango dute azken epaia, itxura guztien arabera.
Bake Bideaken aburuz, "segurtasunaren ikuspegi soilak itsuturiko magistratuek ez dute euskal auziaren izaera berezia kontuan hartzen". Horregatik, herritarrak deitu ditu uztailaren 23an, larunbatarekin, antolatu duten blokeo eguneko mobilizazioetan parte hartzera.
Espainiako Auzitegi Nazionaleko Manuel Carcía Castellón epaileak sei pertsona epaituko ditu Ongietorrien auzian: Antton López Ruiz Kubati, Kai Saez de Egilaz, Pipe San Epifanio, Haimar Altuna, Oihana Garmendia eta Oihana San Vicente. Guztiak Sortuko kideak... [+]
Astelehenean jakinarazi du albistea Etxerat elkarteak. Otxandioko preso politikoa baldintzapeko askatasunean zegoen 2023ko martxoaz geroztik.
Kontzertuen bidez euskal preso eta iheslariak laguntzea da xedea. Aurten, Rakatapunk, Xutik eta Esne Beltza dira egitarauan.