Etxeratek antolatutako Itsas Martxa egin da igandean Plentziako itsaslabarrean, eguerdiko 12:30etan, zazpigarren urtez. “Dispertsioa stop! Preso, iheslari eta deportatuak Euskal Herrira!” izan da aurtengo leloa. Urtero lez, senideei omenaldia egin zaie lehenbizi, eta ondoren preso bakoitzeko lore bana uretara bota eta martxa egin dute paseotik hondartzaraino.

Koronabirusak eragindako pandemia egoera dela eta, antolatzaileek “elkar zaintzea eta osasun neurriak bermatzea” eskatu dute, eta aurten ez dute bazkari herrikoirik antolatu martxa burutzean.

Deitzaileek, “salbuespenezko espetxe politika hiltzailearekin amaitzeko beharra” azpimarratu dute. Ildo beretik, “berandu baino lehen denak etxera”, nahiz “preso, iheslari eta deportaturik gabeko Euskal Herria” aldarrikatu dituzte.

Duela hiru urte Badajozeko espetxean preso zegoela bihotzekoak jota hil zen Kepa del Hoyo gogora ekarri dute. 2017an egin zen IV. martxan Del Hoyoren emazte Maite Sánchezi eta bien semea den Peruri omenaldia egin zieten kaian. “Hiru urte Kepa barik. Abuztuaren 16ko VII. Itsas Martxa honetan, Kepa erail zuen eta indarrean jarraitzen duen espetxe politika kriminala bertan behera gera dadila”, eskatu dute.