Azaroaren 14an eta 15ean, Bartzelonan, ELEN-en batzar orokorra egin dute. ELEN hizkuntza gutxituak eta desagertzeko arriskuan dauden hizkuntzak babestu eta sustatzeko lan egiten duen Europako gobernuz kanpoko sare handiena da. Batzarrean Europako hizkuntza eragileen ehun ordezkari bildu dira, 180 erakundetakoak.

Europako eragileen aurrean irakurritako ebazpenean, Kontseiluak gogorarazi du orain dela urtebete Bilbon ELENek egindako batzarrean euskara larrialdi linguistiko egoeran dagoela adierazi zuela. Biziberritze garaia “amaitzear” dagoela azpimarratu du, eta euskararen etorkizuna “jokoan”. Minorizazio egoera gainditzeko beharrezkoak diren hizkuntza-politikarako “neurriak desegiten” ari direla salatu du. Larrialdiak larrialdi, Kontseiluak itxaropena helarazi nahi izan die batzarkideei: “Konprometituta gaude larrialdi hori indar kolektibo bihurtzeko”. Bide horretan, “euskaltzaletasun aktiboa” babesteko deia egin du, eta azpimarratu “une oro euskararen berpiztea euskaltzaleen eskutik etorri dela: milaka pertsonaren ekimenetik, determinaziotik eta jardunetik. Batez ere, une erabakigarrietan elkarrekin bat egiteko eta kolektiboki jarduteko gaitasunetik”.

Kontseiluak dei egin du Bilbo abenduaren 27an euskararen eta hizkuntza gutxituen aldeko topagune erraldoi bihurtzera.

ELENeko eragileek Kontseiluak batzarrean aurkeztutako ebazpena babestu dute eta herritarren aktibazioa eta mobilizazioa eskatu dute.