Bederatzi puntu ditu agiriak. Laburtuta jaso ditugu hemen:

1. ETAk bakerako bide-orritik zegozkion konpromiso guztiak bete ditu. Espainiako Gobernuak berriz, bere hitza jan zuen. (...) ETAk Espainiako zein Gasteizko gobernuen aurrean egoera zuzentzeko gestioak egin zituen, baina ordurako PSOEk prozesua desitxuratzeko eta usteltzen uzteko erabakia hartua zuen.

2. ETAk, hala ere, bere konpromisoari eutsi dio eta, bere Ordezkaritzaren bidez, konponbide prozesuan aurrera egiteko eta bake elkarrizketak zabaltzeko ahalegin ugari egin du.

3. Espainiako Gobernuak jakin bazekien gatazkaren ondorioak gainditzeko elkarrizketa gunea prest zegoela eta ETAk bururaino iristeko konpromisoa duela. (...) Baina ez du inolako seriotasunik erakutsi eta elkarrizketa gunea hiltzen uztera jo du.

4. Frantziako Gobernuak, ETAren proposamenen sendotasuna aitortu arren, Espainiako Gobernuaren itxikeriarekin lerrokatzea erabaki du.

5.  ETAren urrats eta proposamenen koherentzia eta konpromiso maila nabarmendu dute [nazioarteko eragileek], Espainiako Gobernuaren jarrerak ezinegona eta ulertezintasuna sortu dituen bitartean.

6. Negoziazio eta elkarrizketa gunea desegin izanak ETA eta Nazioarteko Egiaztatze Batzordearen arteko harremana zailduko du aurrerantzean. Horrenbestez, ekarpen eraikitzaileak egiteko aztertzen ari ziren aukerak kolokan gelditu dira.

7. ETAk argitu nahi du armagabetzearen gaia Nazioarteko Egiaztatze Batzordeak bere sorreran jaso zuen mandatutik kanpo dagoela eta, hortaz, ez dela egon eta ez dagoela ETA eta Nazioarteko Egiaztatze Batzordearen lan-agendan.

8. Edonola ere, ETAk armagabetzearen gaiaz hitz egiteko prestutasuna agertu duela oroitarazi nahi du.

9. Prozesua kaltetzea beste helbururik ez duten toxikazio eta filtrazio interesatuen aurrean, ETAk argipenak emateko beharra ikusi du, euskal herritarrek gertaera hauen berri zuzena izan dezaten.

ETArentzat, bestalde, "gero eta ulergaitzagoa da EAJ Espainiako Gobernuari behin eta berriz eskaintzen ari zaion babesa".

"Ulergaitza da, halaber, PNVk Espainiako Gobernuaren itxikeria estaltzeko eta kritika oro saihesteko diskrezioaren argudioa erabiltzea, benetan kontuzko gaiak direnen inguruan plaza publikoan arduragabe espekulatzen ari den bitartean".

ERREAKZIOAK

Mariano Rajoy (Espainiako presidentea): "Ondorio positiboak helduko dira ETAk behin betiko disoluzioa iragartzen duenean". (Iturria: Diario Vasco)

Iñigo Urkullu (Eusko Jaurlaritzako lehendakaria): "Harrigarria da ETAren agendan desarmea ez egotea". Presoen egoerak "kezkatu" egiten duela adierazi du Urkulluk, haiek pairatuko dituztelako "ondorioak". (Iturria: EITB)