2017ko apirilaren 8an 20.000 lagunen aurrean ETAren desarmatzea eszenifikatzeko egindako ekitaldian esandako hitzak gogora ekarri ditu Bake Bidearen Ipar Euskal Herriko delegazioak prentsari bidalitako agirian. Orduan, gatazkak eragindako biktimen gaiari heldu behar zitzaiola adierazi zuten, “biktima guztien” gaiari, Bake Bideak zehaztu duenez. Eta “sufriarazteko borondatea besterik ez duten atxilotze-baldintzak” bertan behera uzteko premia ere nabarmendu zuten.

Hiru urte geroago, “dramatikoa” da aktualitatea Bake Bidearen Ipar Euskal Herriko delegazioaren ustez. “30 urte bete dira Ion Parot, Jakes Esnal eta Xistor Haramburu Frantzian kartzelatuak direla. Espainian 1978tik 1989ra bitartean egindako egitateengatik Frantziako justiziak betiko kartzelara zigortuak izan ziren. Espainian epaituak izan balira, hau da, atentatuak egin zituzten lekuan, gehienez ere 30 urteko kondena izanen lukete. Gaur aske izanen lirateke”, azaldu du Bake Bideak.

Frantziako Estatuan, ordea, bizi osorako kartzela zigorrera kondenatu zituzten eta 15-18 urteko segurtasun epeak gainditu ostean ere, sistematikoki atzera bota dituzte zigorrak egokitzeko egin dituzten eskaerak. Euskal Herrian 2011tik hona eman diren urratsak gorabehera, “Zigorren Aplikaziorako Auzitegiak zigorraren egokitzapena onartzen duelarik ere, prokuradoreak sistematikoki helegitea aurkezten du!”, deitoratu du Bake Bideak.

“Egoera ulertezina, bidegabea eta arriskutsua da”, Bake Bidearen ustez. “Gaur askatzeko erabakirik ez bada, aukera politiko hau onartzen dela esan nahi du: preso hauek hil arte bete beharko duten zigorra! Duela ia 40 urte heriotza-zigorra indargabetu duen herrialde batean, ulertzen dugu zer esan nahi duen eta ezin dugu onartu. Era berean, ezin dugu onartu gizarteak bere aniztasunean duen aho bateko konpromisoa, alferrikakoa izatea. Hori ere ulertezina, bidegabea eta arriskutsua da”.

Bake prozesuarentzat une hau erabakigarria dela uste du Bake Bideak eta horregatik, hiru presoak askatu behar direla aldarrikatu du.

Hauek dira Bake Bidearen delegazioa osatzen duten pertsonak: Jean-René Etchegaray Euskal Herriko Herri Elkargoko lehendakaria eta Baionako auzapeza, Vincent Bru Pirinio Atlantikoetako diputatua, Frédérique Espagnac senataria eta Akitania Berriko lurralde kontseilaria, Max Brisson  Pirinio Atlantikoetako senataria eta Biarritz eslkualdearentzat departamenduko kontseilaria, Emilie Dutoya  Akitania Berriko lurralde kontseilaria, Alice Leiciagueçahar  Akitania Berriko lurralde kontseilaria, Michel Veunac Euskal Herriko Herri Elkargoko lehendakariordea, Akitania Berriko lurralde kontseilaria eta Biarritzeko auzapeza, Kotte Ecenarro Euskal Herriko Herri Elkargoko lehendakariordea, Hendaiako auzapeza eta Hendaia Hego kosta eskualdearentzat departamenduko kontseilaria, Alain Iriart Euskal Herriko Herri Elkargoko lehendakariordea eta Hiriburuko auzapeza, Lucien Betbeder Auzapezen Biltzarreko lehendakaria eta Lekorneko auzapeza, Michel Tubiana Giza Eskubideen Ligako ohorezko lehendakaria eta Bakegilea, Anaiz Funosas Bake Bideako lehendakaria, Mixel Berhokoirigoin Bakegilea eta Jean-Noel Etxeberri “Tetx” Bakegilea.