Espainiako Gobernuak uko egin dio BVEren biktima Jesus Mari Ijurkoren senideei kalte-ordaina ordaintzeari. Europako Giza Eskubideen Auzitegiak ontzat jo du erabakia, iritzirik kalte-ordainak ukatzeak ez duela urratzen estatu indarkeriaren biktimen errugabetasun printzipioa. Estrasburgok ildo berean egiten duen laugarren ebazpena da.
Jesus Mari Ijurko Herri Batasunako kide izandakoaren alargunari eta alabei kalte-ordainak ordaintzeari uko egin dio Espainiako Estatuak, eta ukapena ontzat jo du Europako Giza Eskubideen Auzitegiak.
Batallón Vasco Español-en (BVE) biktimak dira Ijurko eta haren senideak. 1980an, talde parapolizialak atentatua egin zuten Ijurkoren eta haren emazte Carmen Illarramendiren aurka Errenterian. Erasotik bizirik atera ziren arren, Ijurkok hanka eta beso bana galdu zituen. Erasoagatik 96.161 euroko kalte-ordaina jaso zuten Ijurkoren senideek, 1999ko Terrorismoaren Biktimekiko Elkartasunerako Legean oinarrituta. 2012an aldiz, Terrorismoaren Biktimen Aitortzarako eta Babeserako 29/2011 Legean oinarrituta, desgaitasun osoagatik 180.000 euroko kalte-ordaina eskatu zuten. Eskaria, baina, ez zuen onartu Espainiako Barne Ministerioak, argudiatuz Espainiako Poliziaren eta Guardia Zibilaren txostenen arabera Ijurkok Amnistiaren aldeko mugimenduarekin “lotura” zeukala, Herri Batasuneko kidea zela eta 1978an ETAren agiri batzuk zituelako atxilotu zutela.
Espainiako Gobernuak Jorge Fernandez Diaz Barne ministro zela ekin zion BVE eta GAL taldeen biktima batzuei kalte-ordainak ukatzeari, argudiatuz ETAkoak zirela, nahiz eta hainbat kasutan hala zela adierazten zuen epairik ez existitu. Bide hori hartzea ahalbidetu zion gobernuari 2011ko Espainiako Biktimen Legeak, zeinaren arabera biktima bati kalte-ordaina ukatu ahal zaion baldin eta harremana badute “indarkeriazko ekintzak egiten dituen erakunderen batekin”.
Espainiako Gobernuak Ijurkoren kasuan kalte-ordainak ordaintzea ukatu izana ontzat jo du berriki Europako Giza Eskubideen Auzitegiak, eta ebazpen hori arrazoitu du argudiatuz Espainiako Barne Ministerioak eta Espainiako Auzitegiak erabaki hori hartu dutela Poliziaren txostenetan jasotakoak aintzat hartuta. Europako epaileen arabera, Giza Eskubideen Ituna ez du urratzen kasuak. Estrasburgok ildo berean egiten duen laugarren ebazpena da, beste hirutan ere defendatu baitu kalte-ordainak ukatzeak ez duela urratzen estatu indarkeriaren biktimen errugabetasun printzipioa.
Eskuin muturreko taldeek eta funtzionario publikoek eragindako motibazio politikoko ekintzen biktimen lehen hamabi aitorpenak egin ditu Nafarroako Gobernuak. Beste hirurogei espediente aztertzen ari da.
Asteazken honetan prozesu horren berri eman du Martin Zabalza motibazio politikoko Biktimen Aitortzarako eta Erreparaziorako Batzordeko lehendakariak. Ostegunean, Egiari Zor Fundazioak eta Nafarroako Torturatuen elkarteak pauso garrantzitsua dela adierazi dute Iruñean... [+]
Sanfermines-78: gogoan! elkarteak, German Rodriguezen ahaideek, 1978ko sanferminetako gertaeretan larriki zauritutako pertsonak eta Iruñeko Peñen Federazioak 2019ko urtarrilean kereila bat paratu zuten 1978ko sanferminetan, Iruñean, jazotako poliziaren... [+]
Datorren igandean, urriaren 15ean, beteko dira 40 urte GALek Joxean Lasa eta Joxi Zabala Baionan bahitu zituela. Guardia zibilek torturatu eta hil ondoren, oraindik ez dituzte terrorismoaren biktimatzat hartu.