Apirilaren 20an argitaratu du Nafarroako Foruzaingoak sare sozialetan autokontsumorako diren baratzeetara joan-etorria egin ahal izateko jarritako murrizketen berri. Argitaratu duen oharrak azaltzen duenez, Espainiako Barne sailak atera ditu arau murriztaile hauek, eta Gobernu Delagaritzaren bidez iritsi zaie Foruzainei oharra.

Autokontsumorako baratzeetara joateko aukerarik ez, "orokorrean"

"Orokorrean ez dago baimenduta autokontsumorako baratzeetara joatea". Baimenduko da kasu hauetan soilik, eta salbuespen gisa: "Interesatuaren egoera ekonomikoaren arabera, bertako produktuak kontsumitzea ezinbesteko bada biziraupenerako".

Jarraian ezartzen ditu zein diren gorde beharreko segurtasun neurriak, berriz ere azpimarratuz, "biziraupenerako elikagai bila eta etxeko ekonomiari eusteko egiten diren baratzerako joan-etorrietan":

1.-Etxetik baratzerako distantziaz: herrian bertan edo ondoko herrian kokatuta dauden baratzeetara joan ahalko da.

2.-Bakarrik joan beharko da baratzera eta ez beste baratzezainekin solastu.

3.-Astean bi bider soilik joan ahalko da, eta ahalik denbora gutxien eman ahalko da baratzean.

4.-Ezin da bigarren etxebizitzako edo aisialdiko baratzeetara joan. (Ez du zehazten zein baratze diren aisialdikoak)

5.-Indar polizialek eskatu ahalko dute baratze horren jabetza edo berau erabiltzeko baimena ematen duen dokumenturen bat aurkeztea, eta baita ere azalpenak eman behar izatea baratzean egiten ari den lanei buruz.

Nafarroako hamabi elkartek sinadura bilketa abiatu dute, Nafarroako Gobernu Ordezkariari eskatzeko "berariaz eta interpretazio posiblerik gabe, utzi ditzala autokontsumorako elikagaiak ekoiztera bideratutako baratzeetan egiten diren jarduera guztiak" (hemen elkarte horiek zein diren eta kanpainaren xehetasunak).

Elkarteek neurri murriztaileen kontra-argudioak eman dituzte

- Astean bi egunetan soilik joan ahal izateak ez duela "inolako logikarik" diote, "lan handieneko unean gaudelako eta, gainera, nekazaritza-lanak meteorologiaren araberakoak direlako: adibidez, landatu berri diren laboreak, eguzkia eta beroa egiten badu, ia egunero ureztatu eta zaindu behar dira".

- Egoera sozioekonomikoaren arabera egotea joateko baimena, "diskriminatzailea" dela adierazi dute, eta "ez du errazten Egoki Elikatzeko eta Nutriziorako eskubidea, nazioarteko eta Europako hainbat zuzentarau eta hitzarmenetan jasoa (FAO, Europako Batzordea...), non ezartzen baita gobernuen erantzukizuna dela eskubide hori errespetatzea, babestea eta bermatzea, batez ere krisi-garaian".

- Baratzearen titulartasuna frogatzeko eskatu ahal izango dute poliziek. Hori beste traba bat dela diote, izan ere, "kasu askotan lurra lantzen duten pertsonak ez dira jabeak, lagapen informal ugari daude, medianiak eta abar".

- "Aisialdiko baratzeak" zein dira? elkarteek salatu dute horrela deituta "haien zeregina gutxietsi egiten dela bakarrik entretenimenduari lotuta, kontuan hartu gabe elikaduran eta elikadura-subiranotasunean duten funtsezko funtzioa, soilik balio monetario edo komertzialik ez duelako".

Espainiako Barne saila eta Nafarroako Gobernu Ordezkariaren artean dago pilota

Oharra Nafarroako Gobernu Ordezkariaren izenean jaso du Foruzaingoak, baina ohar horretan muga nagusia, hau da, "orokorrean autokontsumorako baratzeetara joatea ez dagoela baimenduta" Espainiako Barne sailaren izenean egiten da. Norena da, beraz, erabakimena? Oharrak "autoritate konpetentea" aipatzen du, zehaztu gabe zein den. Nafarroako elkarteek salatu dute erkidego bakoitzean Gobernuaren ordezkaritza interpretazio ezberdina egiten ari dela 463/2020 Errege Dekretuari buruz, eta Gobernuak Nafarroan duen ordezkaria egiten ari den interpretazioa "murriztailea eta beste erkidego batzuetan egiten den interpretaziotik desberdina" dela.

Hemen Nafarroako Foruzaingoak sare sozialetan zabaldutako oharra: