Emakumeak borrokan

Eskuin muturreko kide batek labanaz egin die eraso ezkerreko independentistei Bartzelonan

  • Bartzelonako Manlleu herrian gertatu da. Erasotzaileak CUP alderdi politikoaren informazio karpa bat apurtu du lehenik, eta herriko casalean –egoitza sozial independentista– bildutako pertsonen aurka egin du ondoren, labana handi batekin. Elkartasuna eta salaketa laster piztu dira.

     

ARGIA @argia
2019ko maiatzaren 20a
Erasoaren aurkako kontzentrazioa Manlleuko plaza nagusian. Argazkia: La Directa.

Roberto Lopez Zambrana eskuin muturreko kide ezaguna da Herrialde Katalanetan. Asteburu honetan hainbat eraso egin ditu ezker independentistaren aurka. Larunbata goizean Osona herriko merkatuan CUPek jarria zeukan informazio karpara hurbildu, pertsonen aurka oldartu eta karpa apurtu zuen. Ondoren, 10 kilometro eskasera dagoen Manlleu herriko Boira Baixa Casal independentistarara jo zuen. Labana handi batekin inguruan zeudenak erasotzen saiatu zen, eta erasotuak lokalaren barnean itxi ziren. Udaltzaingoko kideak bertaratzean, horien aurka ere egin zuen Zambranak atxilotua izan aurretik.

Gaua komisaldegian igaro ostean libre geratu da eskuin muturreko kidea, kargu pean eta casal independentistara 100 metro baino gutxiagora hurbiltzeko debekuarekin. Zambranak erasoak burutu ditu Manlleuko CUPeko kideen aurka lehenago ere, eta urtebete dela udaletxeko balkoian eskegita dagoen estelada kendu zuen. CUPek kritikatu egin du Zambrana 24 ordutan libre uzteko erabakia: “Berriro ere faxismoa eta inpunitatea eskutik doaz” idatzi du alderdi independentistak, erasoaren larritasuna nabarmenduz.

Ofiziozko abokatuaren kontzientzia eragozpena.

Erasoak elkartasun adierazpen ugari piztu du sarean, norbanakoenak zein eragile sozial eta politikoenak. Askok ekimen independentista baketsuen kriminalizazioa eraso faxisten zigorgabetasunarekin alderatu dituzte. Larunbateko arratsaldean bertan udaleko hainbat alderdi politikok deituta kontzentrazio jendetsua burutu zen Manlleuko plaza nagusian. Gertaera honen harira ezagun egin da, bestalde, Raimon Montoliu Casals abokatua. Montoliu  da Zambranari komisaldegian egokitu zitzaion ofiziozko abokatua eta honek uko egin dio eskuin muturreko kidea defendatzeari, “kontzientzia eragozpena” argudiatuta.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Herrialde katalanak  |  Faxismoa

Herrialde katalanak kanaletik interesatuko zaizu...
Azkenak
EGILEA
Eguneraketa berriak daude