“Eskuin muturraren terrorismoa mehatxu bihurtu da Alemaniarentzat”
Ultraeskuindar baten eraso xenofoboak hamaika hildako eta bost zauritu eragin ditu Alemaniako bi “shisha tabernatan” (batez ere komunitate kurdua bildu ohi da bietan). Aurten, Alemanian hildakoak utzi dituen eskuin muturraren hirugarren ekintza terrorista dela eta ultraeskuinaren terrorismoa mehatxu dela ohartarazi du Alemaniako Atzerri ministroak.
43 urteko gizonak zortzi pertsona hil zituen asteazken gauez Hanau hirian. Ondoren, etxean, ama hil eta bere buruaz beste egin zuen. Fiskaltzak baieztatu du eskuin muturreko kutsua duen eraso terrorista izan dela. Idatzi bat aurkitu dute gizonaren etxean, eta bertan dio, besteak beste, atzerriko jatorria duen hainbat jende Alemaniatik kanporatzea ezinezkoa dela eta horiek suntsitzea beharrezkoa dela.
Panorama arras kezkagarria
Pasa den ostiralean, eskuin muturreko hamabi kide atxilotu zituzten Alemanian, mezkiten aurkako eraso masiboa prestatzen ari zirela leporatuta.
Talde antisemita eta arrazistetako 24.100 kide atzeman dituzte herrialdeko Inteligentzia Zerbitzuek, eta horietatik 12.700 biolentotzat dituzte. Panorama “oso-oso kezkagarria” dela iritzi dio Gobernuak.
