Hiru zutabe izango ditu mobilizazioa eta Gasteizko toki banatik aterako dira: lehena, Abastos plazatik, bigarrena San Anton Plazatik eta hirugarrena Prado Parketik. Guztiak 18:00etan irtengo dira. Andra Mari Zuriaren plazan dira elkartzekoak, 18:30ak aldera.

Ohar bidez helarazitako mezuan plataformak dio egungo hezkuntza sistemak “desberdintasunak errepikatu eta areagotu” egiten dituela. Esaterako, EAEn, baliabide urriko familien edo etorkinen %75 eskola publikoan dago. Gasteizen egoera muturrekoagoa da, ehunekoa %92ra iristen baita. Datuok haur eta lehen hezkuntzakoak dira.

Eskola publikoa bigarren maila batean uztea ez ezik, egungo egoerari sistema publiko dual bat gehitu behar zaiola diote antolatzaileek. Hau da, diru publikoz hornitzen diren ikastetxe pribatuak. Duela 30 urte hauek sortu zirenetik, eskola publikoaren “gainbehera” geldiezina izan dela nabarmentzen dute, besteak beste, baliabide gutxiago bideratu direlako hezkuntza publikora. Gainera, nahiz eta diru publikoa ikastetxe horietan inbertitu arren, hainbat eta hainbat familiarentzat sarbide kuotak ordainezinak izaten jarraitzen dutela ohartarazi dute.

Ikasleen jatorriarengatik edo maila sozio-ekonomikoarengatik eragindako eskola segregazioaren amaiera eskatuko dute ostiraleko manifestazioan. Gainera, eskoletan izena emateko udal bulego bakarrak sortzea eskatu dute, diru publikoarekin finantzatutako ikastetxe guztien benetako doakotasuna, eta heziketa laikoa jasotzeko eskubidearen bermea hezkuntza sare guztira zabaltzea.

Ruben Sanchez Bakaikoak gaiari buruz idatzi du Argian duen blogean. Hemen irakur dezakezue artikulua.