Errusiako Armadak su-etena iragarri du Mariupolen

  • Korridore humanitarioetatik barrena zibilak ateratzeko hartu du erabakia Moskuk. Hala ere, Ukrainako ordezkariak mesfidati agertu dira, ez diote sinesgarritasun osoa bideratu Errusiak plazaraturiko erabakiari.


2022ko martxoaren 31n - 11:52

Ostegun honetan hasi da su-etena Mariupol hirian, korridore humanitario bat irekitzeko eta bertatik barrena zibilak ateratzeko. Mikhail Mizintsev Errusiako Defentsa Kontrolatzeko Zentro Nazionaleko buruak eman zuen erabakiaren berri. Hala ere, Ukrainako agintariak ez dira erabat fidatzen Moskuren hitzei eta diote Donbass lurraldean erasoekin gogorki segituko duela Putinen armadak.

Zibilak Mariupoletik Zaporizhiara ebakuatzea da ideia, eta bidean, Berdiansk hirian geldialdia egingo lukete ihesean direnek. Ukrainako Gobernuak 45 autobus bidali ditu bertara: "Ahal dugun guztia egingo dugu autobusak gaur Mariupolen sartzeko eta oraindik hiritik irten ezin izan duten pertsonak hartzeko", Mizintseven hitzetan. Azken asteetan, ahal bezala eta bizia arriskatuz dabiltza hiritik ateratzen milaka herritar.

"Bigarren fasea: Donbass askatzea"

Errusiako armadak hiru aste baino gehiago daramatza Ukrainako Mariupol hiria setiatzen, Azoveko itsasoaren kontrola hartu ondotik. Donetsk eskualdean dago Mariupol, Ukrainaren hego-ekialdean. Donbass lurraldea inportantea zaie bi aldeei eta 2014an hasi zen Donbasseko gerra odoltsua. Gizadiaren kontrako krimentzat jo ditu Ukrainako presidente Volodimir Zelenskik Errusiak Mariupol hirian burutu azken erasoak. Milaka dira azken asteetan hiri horretan hildakoak.

Otsailaren 24an hasitako Ukrainaren inbasioaren "lehen fasea" bukatutzat eman zuen Errusiak martxoaren 25ean. Armadako buruzagiorde Sergei Rudskoik plazaratu zuen albistea: Helburu nagusiak "beterik" dituzte –tartean, haren hitzetan, Errusiak kontrolpean ditu Azoveko itsasoa baita Kherson eta Zaporizhia eskualdeak ere; Txernobylgo eta Zaporizhiako zentral nuklearrak hartuta dauzka; Kiev, Txernigiv, Kharkiv, Sumi eta Mikolaiv eskualdeak blokeatuta dauzka–. Bigarren fasearen irekiduraren berri eman zuen, zehaztuz nagusiki "Donbass askatzea" dutela "helburu".

Ukraina eta Errusiaren arteko negoziaketetan aipagai nagusi dute Donbass eskualdea. Vladimir Medinski Errusiaren ordezkaritzako buruak azken bileratik ateratzerakoan berretsi izan du Donbassi eta Krimeari buruz Moskuk hasieratik duen jarrera "aldaezina" dela: Kievek Luhankseko eta Donetskeko herri errepubliken independentzia onar dezala, baita Krimea Errusiaren parte dela ere.

Luhankseko eta Donetskeko herri errepubliken independentzia aitortu zuen Errusiako presidente Vladimir Putinek otsailaren 21ean, Ukrainaren eta Mendebaldearen haserrea areagotuz. Ukrainatik bereizi eta independentziaren alde agertu zen gehiengo zabala 2014an bi lurralde horietan egindako erreferendumetan. Orduz geroztik gerra pizturik da Ukrainaren eta Errepublika horien artean.


Kanal honetatik interesatuko zaizu: Ukrainako gerra
Europak armak erosiko ditu, zuri pentsioa kenduta

Badator gerra handi bat. Gastu militar ziztrin horiekin ez goaz inora. Trumpek bakarrik utziko gaitu oraingoan. Herritarrek prest egon behar dute Putinen aurrean... Europar Batasuneko agintarien artean nagusitzen ari den diskurtso hori, hitz bakarrean laburbiltzen da:... [+]


Pablo Gonzalez "berehala" askatzea exijitu dute Gernikan eta nazioartean

Bi urte Polonian preso daraman kazetaria "berehala" askatzeko exijitu dute ehunka lagunek Gernikan. Madrilen, Espainiako Kongresuaren aurrean elkarretaratu dira alderdi ugaritako diputatuak; Espainiako Atzerri ministro Jose Manuel Albaresen esanetan, kazetariaren... [+]


Babes gutxi jaso du NATOko tropak Ukrainara bidaltzeko Macronen planteamenduak

Ukrainari buruzko nazioarteko bilera burutu zuten otsailaren 26an hogei bat estatuburuk eta horren berri emateko prentsaurrekoan bota du Emmanuel Macron Frantziako presidenteak NATOko tropak Ukrainara bidaltzeko planteamendua.


Zelenski: "Ukrainako 31.000 eta Errusiako 409.820 soldadu hil dira gerran”

Gerran hil diren ukraniarren inguruan Errusiak emandako datuak ezeztatu ditu Volodimir Zelenski Ukrainako presidenteak. Laguntza militarra ematen jarraitzeko eskatu die AEBei.


Eguneraketa berriak daude