Errepresioari aurre egiteko kanpaina abiatu du Bilboko Langile Autodefentsa Sareak

  • Limpiezas Arana – Fernández Aguilar enpresarekin abiatutako gatazka tarteko, jasaten ari den errepresioa bistaratu du Langile Autodefentsa Sareak. Estortsio jarraitua leporatzen diete, eta zazpi kide daude deklaratzera deituak apirilaren 15ean. Sarearen jardun sindikala estortsio gisa epaitegietara eramateak “aurrekari larria” ezarri dezakeela salatu dute. Errepresioaren aurrean elkartasuna lortu asmoz, kanpaina jarri dute martxan.


2021eko apirilaren 09an - 14:05

Bilboko Langile Autodefentsa Sareak (LAS) agerraldia egin du ostiralean Arriaga plazan, “Langile borrokari errepresiorik ez. Korapiloa askatu” kanpaina argitara emateko. Sareko zazpi kide epaitegietan deklaratzera deituak daude apirilaren 15ean, eta zitazioaren bezperetan jarri dute martxan sareari elkartasuna helarazteko kanpaina. Beronekin, aurre egin nahi diote beren jardunagatik pairatzen ari diren errepresioari.

Helburutzat dute otsailetik jasaten ari diren errepresioa ikusaraztea, otsailaren 22a eta 25a artean Espainiako Poliziak sareko sei kide atxilotu baitzituen, Limpiezas Arana – Fernández Aguilar garbiketa enpresarekin abiatutako gatazkaren harira. Horrez gain, badute bestelako xederik ere: “Langile klaseko sektore ezberdinen arteko elkartasuna” bultzatzea eta ageriko egitea “hau ez dela ez isolatutako kasua ezta koiunturala ere, estrukturala dela sistema kapitalistan”.

Jakinarazi dutenez, kanpainak dagoeneko badauka hainbat eragile politiko, antolakunde eta sindikaturen babesa, eta datozen egunetan atxikimendu gehiago biltzeko esperantza agertu dute. Herritarrek atxikimendua eman ahal dezaten, www.korapiloaskatu.com web-orria jarriko dute martxan apirilaren 10ean; interesa duenak bertan edukiko du manifestua irakurgai, baita atxikimendua emateko bidea ere.

Estortsioagatik akusatuak

Bilboko Uribarri auzoko Limpiezas Arana – Fernández Aguilar garbiketa enpresarekin hasitako gatazka du abiapuntu sarearen aurkako errepresioak. Enpresako langile ohi bat, lanean pairatzen zituen gehiegikerien aurrean, LASekin harremanetan jarri zen iaz. Azaroaren 26an, enpresak gauzatutako gehiegikerien aurrean hainbat exijentzia zerrendatzen zituen gutuna helarazi zioten enpresako buruari, gatazka abiatuz; eta erantzunik jaso ez izanaren ondorioz, gatazkaren izaera publikoa indartuz joan dira azken hilabeteetan.

Gatazkaren baitan deitutako mobilizazioetako batean, urtarrilaren 11n, Poliziaren dispositibo handiarekin egin zuten topo, eta Ertzaintzak bi kide identifikatu zituen. Lehen errepresio kolpe hori enpresako nagusiak sarearen kontra jarritako salaketarekin lotu du LASek. Identifikazioen ondotik, mobilizazioak deitu eta komunikabideetan hitz egin zuten zenbait kidek zitazioak jaso zituzten epaitegietatik, otsailaren 25ean Bilboko Epaitegietara deklaratzera joateko. Alabaina, data horren bueltan Espainiako Poliziak sei kide atxilotu zituen –bi otsailaren 22an eta beste lau 25ean–, langilea bera tarteko, eta epaitegietako hitzordua apirilaren 15era atzeratu zieten, atxilotutako gainontzeko kideei ere deklaratzera dei eginez. Estortsio jarraitua egitea leporatzen zaie, bost urtera arteko espetxealdiaz zigortu daitekeen delitua.

Auzibideak jardun sindikala estortsio delitu bezala epaituz gero, aurrekari larri baten aurrean geundekeela ohartarazi dute LASeko kideek kanpainarako idatzitako manifestuan. Izan ere, mugarria jarriko luke sindikalgintza eredu horri jarraitzen dion ezein kolektiboren jarduna delituzko jotzeko. Hori horrela, argi seinalatu dute beren ustez jarraitu beharreko bidea: “Beharrezkoa da egoera honi buelta ematea, gure indarrak handitzea, errepresioaren aurrean borrokatu eta klase elkartasuna antolatzeko. Borroka langile klase osoarena delako, korapiloa askatu”.

Mobilizazio gehiago

Datozen mobilizazioen berri emateko ere probestu dute agerraldi publikoa. Apirilaren 15ean, deklaratzera joango diren zazpi kideei elkartasuna adierazteko, 12:00etan elkarretaratzea deitu dute epaitegi aurrean, Buenos Aires kalean. Bestalde, maiatzaren 1ean ere elkarretaratzea egingo dutela jakinarazi dute, “langile klaseak jasaten duen errepresioa ikusarazteko eta habian dauden borroka ezberdinei ahotsa emateko”.


Kanal honetatik interesatuko zaizu: Langile borroka
Soldaten emendioa aldarrikatzeko greba eguna burutu dute Ipar Euskal Herriko sektore publikoan

500 lagun batu dira Baionan buruturiko manifestazioan. Sektore publikorako erreformarekin Frantziako Gobernuak sektore pribatuko logika funtzionarioen baitan txertatu nahia salatzeko mobilizazioa ere izan da.


EAE-ko sektore publikoa euskalduntzeko dekretua
Aukera galdua

Eusko Jaurlaritzak EAEko Euskal Sektore Publikoan Euskararen Erabilera Normalizatzeko Dekretua onartu du otsailean. Duela 27 urteko dekretua ordezkatu du. Euskalgintzako eragileen ustez, Jaurlaritzak ez du baliatu “jauzi ausarta” emateko. Dekretu berriak ez du... [+]


Industria agortu eta gero, zer?

Beriain (Nafarroa), 1974ko otsaila. Potasas de Navarra enpresako langileek greba egin zuten, besteak beste, aurreko urtean Motor Ibérica lantegiko langileek egindako grebak bultzatuta. Ez zen, beraz, Nafarroako industriako lehen greba, ezta Potasasena ere. Baina Potasas... [+]


Eguneraketa berriak daude