"Zazpi hilabete geroago, hemen jarraitzen dugu, zutik. Lanean jarraituko dugu sarraski hori gerarazteko" adierazi du Juanjo Hermoso de Mendoza BSHko langile batzordeko presidenteak. Manifestazioan fabrikaren itxiera eragozteko neurriak eskatu dituzte, BSHk eta sindikatuek enplegu erregulazioaren baldintzak negoziatzen dituzten bitartean. Erregulazio espedientea aurkezteko azken eguna uztailaren 17a da, eta batzordeko presidenteak lanean jarraituko dutela adierazi du. Lau bilera egin dituzte enpresaren ordezkariekin, eta Hermoso de Mendozaren arabera, "maila eskasa" erakutsi dute, "horrelakoa dela bizitza" adierazi diete langileen ordezkariei.

Manifestazioaren hurrengo egunean, sanferminetako txupinazoan hainbat pankarta kokatu zituzten langileek, beren borrokari ikusgarritasuna emateko asmoarekin.

Uztailaren 7an BSHren Bruselako egoitzan bilera daukate langileek Europako Batzordeko Enplegu komisarioarekin eta Industria komisarioarekin. Langile batzordeko presidenteak espero du bileran "multinazionala baldintzatu dezakeen neurriren bat hartzea".

Billabesetako langileak greban

Alberto Longas TCC Moventis enpresako langile batzordeko buruak adierazi zuen greba sanferminak hasi baino lehen bertan behera uztea "ia ezinezkoa" zela, enpresak ez baitu inolako neurririk hartu. Sanferminak hasi dira eta billabesetako langileen greba mugagabeak aurrera jarraitzen du. Ehunka lagun elkartu dira larunbatean hitzarmen duina eskatzeko, Moventis TCC borrokan lelopean.

Manifestazioa baino egun bat lehenago, ostiralean, Iruñerriko mankomunitatea, TCC Moventis eta sindikatuak bildu ziren. Bilera horretan enpresak, Longasen hitzetan, "ez zuen langileen batzordeko kide bakar bat ere asebete". Bere esanetan, enpresak negoziatzeko "borondaterik ez dauka" eta mankomunitateak "eskasa". Sanferminak direla eta azken orduko konponbidea egongo zela ustez zuten langileek, ez da horrelakorik gertatu, ordea. Enpresaren aurreko kontratuan %5,4an murriztu zitzaien soldata langileei. Ehuneko hori berreskuratzea eskatzen dute, baina prest daude horri uko egiteko egutegian eta bestelako baldintzetan hobekuntzak badaude.