"Au Planning, les hommes aussi peuvent être enceints" –"Planning-ean gizonak ere haurdun egon daitezke"– mezua dakar afixak, eta bikote bat ageri da, bata haurdun dagoela, eta kulturalki gizonezkoei lotu ohi zaizkien elementu fisikoekin bat ala bestea –bizarra eta burusoiltasuna–. Horra zer dakarren Planning Familial elkarte historikoaren afixak. Trans pertsonen eskubideen aldeko mezua zabaltzeko dokumentu izan behar zena, transfobia plazaratzeko bide bihurtu dute ehunka herritarrek, sare sozialetan zein kaleetan. Heriotza-mehatxuak jasotzen ari dira Planning Familial-eko hainbat militante eta irainak berriz, sare sozialetan trans pertsonei elkartasuna adierazten duen oro. Hitzetatik haratago, elkartearen hainbat egoitzari eraso egin diote azken egunetan, tartean Lilles eta Mont-de-Marsan hirietakoak.

Gogorra eta bortitza izaten ari da elkartearen aurkako kanpaina eta agiri bidez ihardetsi die erasoei abuztuaren 19an: "65 urtez aktibo dagoen elkartea gara, eta inolako baldintzarik gabeko harrera bideratzen gabiltza. Berdin dio parekoak daukan genero identitatea. Urtero guregana datozen 300.000 pertsonen artean badaude trans pertsonak, kontrazepzioaz, abortuaz edota haien trantsizioari buruzko segimendu medikoaz galdetzen digutenak. Gure ardura da hauen errezibitzea, ongi etorriak direla sentiaraztea”. Trans pertsonek Planning Familial-aren mugimenduan haien lekua daukatela berresteko baliatu du agiria elkarte feministak.

Salaketa jartzeko bidea aztertzen dabil elkartea, eta hori "herra bideratzen dabiltzanen" aurka, zehaztuz "tarteka, Errepublikako hautetsiak ere direnak". Hain zuzen, eskuin muturreko eta eskuineko hainbat hautetsi agertu dira afixak dakarren mezuaren aurka, tartean, RN Marine Le Penen alderdikoak eta Reconquête Eric Zemmourren alderdikoak.

Gaur egun Frantziako Estatuan aitatasuna ez zaio bermatzen erditu duen trans pertsonari, nahiz eta uteroa izanik haurdun egon eta erditu. 2016ko azaroaren 18ko legeari segi, trans pertsonak sexuaren aipua aldatu dezake egoera zibileko dokumentuetan eta hori interbentzio hormonal edota kirurgikorik jaso gabe ere. Kontua da, zuzenbideak haurdunaldia amatasunari lotzen duela, bai ala bai.

Elkartasun mezuak ere bai

Frantziako Gobernuraino iritsi da polemika eta Parekidetasunaren ministro Isabelle Romek sostengua adierazi dio elkarteari: "Planning Familial elkarte historikoa da, emakumeen eskubideen, kontrazepzioaren eta abortuaren arloan funtsezkoa duguna. Osoki sostengatzen dut haien ekimena". Ondokoa ere gehitu du: “Ez dezagun utzi eskuin muturra gorrotoa hauspotzen komunikazio-kanpaina bat instrumentalizatuz, eta ulertu dezaket [afixak] ez duela kontsentsua egiten".

Azken egunetan jasotako elkartasun mezuak eskertu ditu txio bidez Planning Familial-ek. Hain zuzen, elkarte, ezkerreko hautetsi, sindikatu, argitaletxe zein herritar xume, ehunka dira transfobia hori salatzeko adierazpenak plazaratu dituztenak. Hemen txioen lagin bat: