Eragotzi al dezakete bizilagunek beren atarian etxebizitza turistikoak irekitzea?

  • Erabilera turistikoko etxebizitzen (ETE) ugaltzea “geldiarazteko erreminta administratiboa” proposatu du Gasteizko Alde Zaharreko Gasteiz Txiki auzokideen elkarteak: atariko bizilagunen bileran ETErik ez dela onartzen erabaki, erabakia estatutuetan jaso, eta jabetza-erregistroan aurkeztu. Hori egin dute jada Margolari kaleko atari batean, eta irekitzear zegoen ETE bat geldiarazi dute bizilagunek. Erreminta gainontzeko euskal lurraldeetan ere aplikagarria dela uste du elkarteak.


2022ko abenduaren 06an - 15:58
Azken eguneraketa: 18:36
Legez kanpoko ETE bat Gasteizko Alde Zaharrean. Argazkia: Dospordos

Ideia beharretik sortu zela azaldu dio ARGIAri Gasteiz Txiki auzokideen elkarteko presidente Manu Arakamak. “ETEen azkenaldiko ugaltzeak gainezka egiten ari digu, esaterako Kanpokale kalean denbora gutxian bitik zortzi ETEra pasa gara, eta horren aurrean defentsarako mekanismo bat behar genuen”. Turistifikazioak auzoen bizitza “sozial, kultural eta ekonomikoan” ondorio “suntsitzaileak” ditu elkartearen ustez (turistifikazioaren ondorioez eta bere bultzatzaileez gehiago jakin nahi izanez gero, hona bi erreportaje sakon hemen eta hemen)

Tramite erraza eta azkarra

Prozesu “sinplea” dela azaldu du Arakamak: “Atariko bizilagunen bileran estatutuen aldaketa bat proposatu behar da, espezifikatuz ez dela ETErik onartzen atarian. Nahikoa da gehiengo sinplea aldaketa onartzeko. Aktan jaso, estatuak aldatu, eta dokumentazioa jabetza-erregistroan aurkeztu behar da”. Aldaketak txikienek ere maiz burokrazia eta izapide asko eskatzen dutenaren jakitun, ohartarazpena egin du auzokideen elkarteko kideak: “Dena egun bakarrean egin daiteke eta ez dago gestoria batera jotzeko beharrik, tramite erraza da”.

Komunitatea egin

“Ez da panazea”, ohartarazi du Arakamak. Bide administratibotik hartutako erabakiaren aurka epaitegietara jo dezake jaberen batek, eta “ikusteke” dago zer gertatuko litzatekeen orduan. Baina epaitegietan galduko balitz ere, bi eragin positibo ditu neurria hartzeak. Batetik, “bizilagunak bildu eta eztabaida mahai gainean jartzearekin soilik komunitatea egiten da, auzoko arazoez mintzatzen gara”. Bestetik, “agian horrela ez dugu ETEn ugaltzea erabat geldituko, baina oztopatu, hori seguru”.

Esperientzia praktikoa

Gasteiz Txiki auzo elkartea oraintxe hazi du kanpaina bizilagunei bide hori egin dezaten proposatuz, baina dagoeneko Margolari elkartean atari bateko bizilagunek egin dute, eta emaitza positiboa izan dela ziurtatu du Arakamak: “ETE bat ireki nahi zuen jabeetako batek, prozesuan ari zen, eta prozesu hori gelditu da”.

Guztientzako erreminta

Arakamak dio elkarteak proposatutako bidea aplikagarria dela Hego Euskal Herri osoan, bide administratiboa izanik. Ipar Euskal Herrirako ere berdin ote den ez dago seguru, bertako errealitatea eta baldintzak ez dituelako ezagutzen. Batzuk eta besteak animatu ditu proba egitera hala ere, “esfortzu txikia eskatzen du, eta ez dago ezer galtzerik”.

Informazioa eta aholkularitza

Gasteiz Txiki auzo elkarteak auzokideei informazioa eta aholkularitza emateko kanpaina abiatu du, eta bi bide jarri ditu: zuzenean elkartearen lokaletatik pasatzea (Eskolak kalea 9), edo agasteiztxiki@gmail.com helbidera idaztea. Arakama seguru dago bidea egin ahala arazo eta behar berriak sortuko direla, eta elkarteak auzokideekin batera horiei erantzuteko prestutasuna duela azaldu du.


Kanal honetatik interesatuko zaizu: Turismo masiboa
25 lagunetara murriztuko dute turista taldeetako gehieneko pertsona kopurua Donostian

Donostia Turismoak apirilaren 10etik aurrera jarriko du neurria indarrean, eta derrigorrez bete beharko da, bestela isunekin zigortuko dutelako gidari turistikoa.


Lau donostiarretatik hiruk uste dute turismoak kalte “handia” egiten diela

Turismoari buruzko pertzepzioaz galdetu die EHUk donostiarrei, eta ondorioztatu du herritarren erdiak baino gehiagok “frustrazioa” sentitzen duela. Donostiako Udalak eta Eusko Jaurlaritzak finantzatu dute ikerketa.


Pisu turistikoak debekatu ditzakete bizilagunek, Espainiako Auzitegi Gorenak ebatzi duenez

Donostiako eta Oviedoko bi eraikinetan izandako arazoak direla eta, epaileek auzokoen erkidegoen esku utzi du pisu turistikoak debekatzea. Hala ere, beharrezkoa izango da debekua eraikineko etxebizitzen-estatutuan jasota egotea.


Tasa turistikoa aplikatzeko lehen urratsak ematen ari da Jaurlaritza

Estatu mailan tasa turistikoa erkidego gutxik jarri badute ere indarrean, mundu mailan dagoeneko 137 hiri turistikotan kobratzen dute zerga hori.


Turistifikazioaren aurkako manifestazio jendetsua egin dute Donostian

Hiritarrek salatu dute turismo jarduerak hirian “gehiegizko bolumena eta pisua” hartu duela. Halaber, egoera “desazkunde turistikorantz” bideratzea aldarrikatu dute, “kalteak handitzea eta iraunkortzea” ekiditeko.


Eguneraketa berriak daude