“Ekologiaz hitz egiteko aitzakia artistikoa da festibala”
Iruñeko Labea Arte, Zientzia eta Natura Laborategia da apirilaren 25etik 30era Iruñean ospatuko den Arbola festibalaren antolatzailea. Artea eta zientzia uztartuz, naturarekin lotutako egitasmoak lantzen ditu laborategiak. Oraingoan, zuhaitzen kultura oinarri hartuta eta hainbat diziplina artistikoren bidez, trantsizio ekosozialaren inguruan hausnartzeko eta alor horretako erronkak jendarteratzeko festibala jarri dute martxan. Lehen edizioa da aurtengoa, eta Iruñeko jaialdi nagusia egiteaz gain, maiatzean eta ekainean Nafarroako beste hainbat herritara ere eramanen dituzte ekimenak Arbola Ibiltariaren bidez: Tafallara, Artzibarrera, Esteribarrera, Monrealera eta Untzuera.
Isabel Ferreira da jaialdiaren zuzendari artistikoa. Horrela azaldu du ekimenaren asmoa: “Azken finean, jaialdia aitzakia bat da, arbolen eta artearen bidez ekologiaz hitz egiteko eta estrategia artistiko eta sortzaileak erabiliz, bizi garen moduaz hitz egiteko”. Izan ere, gaur egun alor ekosozialean ditugun erronkei aurre egiteko artea oso eraginkorra dela uste du zuzendariak, kontzientzia hartzea bultzatzen duelako, baina beldurretik izan beharrean, estimulu positiboetatik abiatuta: “Ni askotan beldurtuta gelditzen naiz ingurumenari lotutako dokumentalak ikustean. Bada, kasu honetan, modu positiboan bultzatu nahi dugu jendea hitzetatik ekintzetara pasatzea”.
Izenak argi azaltzen duen moduan, zuhaitzak ditu erdigunean festibalak. Zergatik zuhaitzak? “Gure gizartean paper garrantzitsua dute arbolek: klima erregulatzaileak dira, bizitzeko beharrezkoak ditugu… estrategikoak dira, baina, aldi berean, oso ezezagunak zaizkigu. Gehiago dakigu ilargiaren gainazalaz zuhaitz batez baino”, gehitu du. Egunerokoan oharkabeko zaizkigun horiei protagonismoa ematea da jaialdiaren helburua, eta horretarako, bertako eta nazioarteko artistekin hainbat ekimen proposatu dituzte: dantza, musika, zinema, erakusketak, antzerkia, tailerrak, hitzaldiak…
Biodibertsitatea eta artea, balkoi artean
Jaialdiaren alde artistikoa, dibulgatiboa eta pedagogikoa nabarmendu ditu Ferreirak. “Orain, esaterako, balkoietan ari gara lanean, gure esparru intimo eta txiki horietan, instalazio botaniko-artistiko batekin”. Madrilgo Lucía Loren artistaren egitasmoa da. Biologoa eta paisajista da bera, eta balkoietan biodibertsitatea erakartzeko egitasmoa da esku artean duena: txorien eta intsektuen hotelez, landare meliferoez eta bestelakoez bete dituzte balkoiak Iruñeko Kale Nagusiko 53. zenbakian, eta festibalean inauguratuko dute "obra". “Proiektu horrek badu bere alde estetikoa, baina baita alde funtzional eta ekologikoa ere”, azaldu du zuzendariak.
Gonbidatutako artisten artean daude gaiaren bueltan lanean ari diren nazioarteko izen ezagunak: Lucía Loren, Marina Guzzo, Cecylia Malik, Martin Etxauri, eta beste hainbat. Egitaraua eta informazio guztia hemen.
Duela hamabi urte pasatxo ezagutu zuten elkar Izaskun Urbaneta Ocejok eta Ainara Baguer Gonzalezek, ingurumen hezkuntzako programa batean lanean ari zirela. Garaian, lurretik hurbilago egoteko gogoa zuten biek, teoriatik praktikara pasa eta proiektu bat martxan jartzekoa... [+]
Zergatik doa mundu guztia Iruñera erosketak egitera, gure eskualdean elikagai asko ekoizten bada? Zergatik da hain zaila bailara hauetako produktuak bailara hauetako dendetan topatzea?”, galdera horiei eta beste zenbaiti tiraka hasi ziren lanean Zangoza aldean duela... [+]
Urteak dira Nafarroan eta beste zenbait tokitan hazien liburutegi proiektuak martxan dituztela. Hazien liburutegiak, liburuen liburutegietan. Euskal Herriko Hazien Sareak antolatutako hitzaldi batean izan zuen egitasmo horien berri Ane Leturia Delfrade Antzuolako liburuzainak,... [+]
Hamar urte baino gehiago daramatza martxan Arabako Nekazariak Eskolan proiektuak, Hazi fundazioak zenbait ekoizlerekin elkarlanean bultzatzen duena. Haur eta gaztetxoak nekazal mundutik geroz eta deskonektatuago bizi diren garaiotan, inoiz baino beharrezkoagoa da elkar... [+]
Ateak ireki berri ditu Bermeon Gu Zu Bio dendak, otsailaren 17an egin baitzuten inaugurazio ekitaldia. Edurne Zulueta Aranguena da proiektuaren bultzatzailea, eta berak azaldu bezala, garbiketako produktuei lotutako kontsumoari buelta bat eman nahi izan dio egitasmoarekin... [+]