Manifestazio jendetsua egin zuen EH Bilduk larunbatean. 17:30ean Bilbon Casillatik abiatu zen manifestazioa eta udaletxearen atarian amaitu zuten. Ultra eskuindar erreakzionarioen testuinguruan EH Bilduko idazkari nagusi Arnaldo Otegik esan du faxismoari eta autoritarismoari aurre egiteko "eraikuntza nazional eta soziala" bultzatu beharra dagoela, eta EH Bildu "konpromiso politiko eta instituzional guztiak" hartzek prest dagoela prest.

Antolatzaileen arabera, 30.000 pertsona batu dituen mobilizazioak ibilbidean zehar hainbat gune izan zituen: frankismoaren biktima guztiak eta tartean Santi Brouard eta Josu Muguruza oroitzekoa, Euskal Errepublikaren eta euskal gaztediaren gunea, eta Euskal Herria Palestinarekin gunea. Gonbidatuen artean, mobilizazioan egon ziren Jon Paredes Manot Txiki-ren eta Angel Otaegiren senitartekoak, baita José Luis Sánchez Bravoren, azken fusilatuen artean zegoen FRAPeko militantearen, sendiak ere. Era berean, Bilboko kaleetan ibili ziren ERC, CUP, Junts, BNG, Compromis, Mes per Mallorca, Podemos, Comuns, Más Madrid eta Comunistes de Catalunya alderdietako ordezkariak. EH Bai-ko zuzendaritzako ordezkariek eta EH Bilduko mahai politikoko hainbat kidek pankarta eraman zuten.

Otegik adierazi zuen erregimen frankistak utzitako “erreforma mugatuaren aurrean” agertoki berri bat eraiki beharra dagoela. Era berean, azpimarratu zuen “fronte zabal” baten beharra dagoela gaur egungo "arriskuko egoerari" aurre egiteko: “Herri honek badu eredu bat faxismoari eta autoritarismoari aurre egiteko, kolektiboki, era diziplinatuan, kolpatuak diren sektore guztiak ahaldunduz eta esparru amankomunean erantzuten, feminismotik, sindikalismotik, langile mugimendutik, toki guztietatik”.

Manifestazioaren biharamunean, Sortuko bozeramaile Arkaitz Rodriguez pozik agertu zen komunikabideen aurrean. Adierazi zuen “harrituta eta kezkatuta” daudela EAJk eta PSEk PPrekin lortu nahi dituzten akordioen harira, gaineratuta akordio horrek “balio hegemoniko eta agindu demokratikoaren” aurka zela.