30.000 pertsona inguruk hartu dituzte Bilboko kaleak EH Bilduk larunbatean egindako martxan. Nazioa gara lelopean, bertaratutakoek lepo bete dute Bilboko Autonomia Kalea, eta amaieran Txoriak txori kantatu dute “euskal nazioa aldarrikatzeko”.

EH Bilduren koordinatzaile nagusi Arnaldo Otegik hitza hartu du manifestazio ostean, eta bere esanetan alderdia da “Euskal Herri osorako proiektu bat antolatzen eta defendatzen duen indar politikoa”. Otegik aurreratu du bigarren legegintzaldi hau “eztabaida plurinazionalak” eta “herrien aitortzak” baldintzatuko dutela: “Hori da orain egin beharreko eztabaida, EH Bilduk mahai gainean jarriko duena”. Halaber, gaineratu du alderdia osatzen ari den “ezkerreko alternatibari” esker iritsi direla alor munizipalean “lehen indar politikoa” izatera.

EH Bilduko legebiltzarkide Oihana Etxebarrietak prentsari eginiko adierazpenetan nabarmendu du martxaren emaitzarekin “oso pozik eta harro” daudela: “EH Bildu eta bere komunitateak adierazi zuen egungo testuinguruak eskatzen duen tokian egoten dakiela, eta bereziki zabaldu berri den auzi territorialari erantzuteko garaian gihar indartsu bat garela erakusteko gai izan ginen”.

Palestina gogoan

Otegik hitzaldian Palestinaren egoera salatu du "Palestina askatu!" oihuen artean: "Ez dago milaka ume hiltzea zilegi bihurtzen duen inongo defentsa eskubiderik".