Israelek Gazaren aurka egiten dituen erasoek gero eta alarma gehiago pizten dute munduan barrena, baita Israelgo aliatu fidelenen artean ere, adibidez AEBetan edo Europar Batasunean. Hori dela eta, lehenbiziz, EBk su-eten eskaera egin dio Israeli. Eskatu du aldi berean, palestinarrek bahituak inongo baldintzarik gabe aska ditzaten eta Israelek laguntza humanitarioaren sarrera baimen dezan inongo oztoporik gabe.

EBk eskatu dio Israeli har ditzala neurriak Gazako herritarren lekualdatze handiagoa gerta ez dadin, eta ez dezala hasi Rafah-ren aurkako erasoa, horrek “egungo hondamendi egoera okertu besterik ez lukeelako egingo”. Charles Michel Europar Kontseiluko lehendakariaren esanetan: “27 estatuok izututa gaude Gazako egoerarekin eta zibilen heriotzarekin”.

Josep Borrell EBko diplomazia-buruaren esanetan, “Gazan gertatzen ari dena ez da krisi humanitarioa, humanitatearen porrota baino. Ez da lurrikara bat; ez da uholdea: bonbardaketa bat da. Krisi humanitario hau eteteko modu bakarra da Israelek zibilak gehiago errespeta ditzan eta baimen dezan laguntza gehiagoren sarrera”.

Borrellek aipatu ditu, halaber, paraxuten bidez bideratzen ari diren laguntzak. “Baina ba al dakizue laguntza hori jaurtitzen den lekutik ordubetera badela aireportu bat? Baina itxita dago”. Eta itsasotik sar daitekeen laguntzaz ere berdintsu jardun du: “Itsas-portu bat eraikitzen ari gara eta Ashkelongo portua hor dago, baina itxita”. Salatu duenez, Israelek mugak itxita ditu eta hornigaiak horregatik ez dira Gazara iristen.

Europar Batzordeko ondorioek, halaber, azpimarratu dute UNRWA palestinar errefuxiatuak laguntzeko NBEren erakundeak egiten duen “ezinbesteko lana”. Bitxia da hori, kontuan hartuta, EBko herrialde garrantzitsuenetakoek duela aste batzuk iragarri zutela erakunde hori ez zutela gehiago finantzatuko Israelen salaketa argitu arte. Israelek salatu zuen UNRWAko hamabi langilek urriaren 7ko Hamasen erasoan parte hartu zutela. Erresuma Batua, Frantzia, Alemania, Italia, Herbehereak, Austria, Finlandia, Errumania, Estonia, Letonia eta Lituania ziren estatu horiek. EBk, den den, ez zituen diru-laguntzak eten.

Europar Batasunaren adierazpena dena den, eremu diplomatikoari dagokiona besterik ez da, eta oraingoz uko egin dio hitzez edo ekintzez Israeli inongo mehatxu edo ohartarazpenik egiteari. Oraindik ere EBko mandatari gorenek epelkeria handiz aritzen dira Israel ahalik eta gutxien mintzeko, baina europar iritzi publikoari zerbait egiten ari dela adierazteko. “Garrantzitsua da Israeli sostengua erakustea –dio Michel kontseiluko presidenteak–, baina eskatu behar zaio baita ere nazioarteko ordena errespeta dezan”. Urriaz geroztik Ursula von der Leyenek oso aipamen gutxi egin die Gazako zibilei. Ostegun honetako bileraren ondoren egindako adierazpenetan zera aipatu zuen: “Israelek badu defendatzeko eskubidea, baina zibilak babesteko beharra ere bai”.

Segurtasun Kontseiluan ere bai

Ostiral honetan bilduko da NBEko Segurtasun Kontseilua eta, AEBen eskariz, lehenbiziz eskatuko du berehalako su-etena Gazan, eta Israel eta Hamasen arteko bahitu trukaketa eman dadila.