Donostiako La Paz erresidentzian adinekoak goizeko 6:15ean esnatzen dituztela salatu du ELAk

  • Donostiako La Paz egoitza Mondragon taldeko GSR kooperatibak kudeatzen du, Egiako auzoan. Hain goiz esnatzeak adinekoentzat lan karga handiagoa eta arreta okerragoa ekartzen du.


2023ko uztailaren 07an - 09:03
La Paz erresidentzia. Argazkia: Inforesidencias.

Donostiako La Paz erresidentzian gaueko ordutegia duten langileek goizeko 6:15ean adinekoak garbitzeko agindua dutela jakinarazi du ELA sindikatuak. Beste erresidentzietan, normalean 8:00etan egiten da. Arazo handiak ekartzen ditu horrek bai adinekoentzat bai langileentzat. "Adinekoak oso goiz esnatzen dituzte, nahiz eta gosaria 9:00etan eman, eta beraz, gaizki deskantsatzen dute, eta ondoren egunean haien egoeran eragiten du", adierazi du.

Gainera, une horretan beste zainketak behar dituzten egoiliarrek ezin dute arreta behar bezala jaso, langileek ezin dutelako garbitze lanak egin eta aldi berean gainerako eskaerei egoki erantzun.

Egoera horren aurrean, zentroko langileek haserrea adierazi diete erresidentzia kudeatzen duen Mondragon taldeko GSR kooperatibari. Aipatutakoaz gain, langileek lan baldintza makurrak salatu dituzte, antolaketa falta, lan karga handia, egutegi kaltegarriak eta ordainketa eza. Zuzendaritzak jaramonik ez diela egiten salatu du ELA sindikatuak, txanda jakin batzuk ez indartzeko eta gaueko txanda dutenei lan handiagoa kargatzeko. Gipuzkoako Foru Aldundiari guztiaren berri eman diotela jakinarazi dute, eta langileen ongizatean eta zentroko egoiliarrei zuzenean eragiten diela egoerak.


Kanal honetatik interesatuko zaizu: Adinekoen zaintza
Aukeratu gabeko bakardadea prebenitzeko proiektu bat martxan jarri du Nafarroako Gobernuak Sakanan

Sakanako pertsona zaharrei babesa emateko proiektu pilotua da Teknoadineko Landab. Bizilagunen parte hartzea “funtsezkoa” dela nabarmendu du Nafarroako Gobernuak.


Proposamen bat zaintza eredua aldatzen hasteko

Bizitza Zaintzeko izenpean, ekonomia soziala ardatz duen irabazi asmorik gabeko elkarte bat sortu dute etxez etxeko sei langilek, Urola Kostan (Gipuzkoan). Ideia sinplea da: enpresen irabaziak langileen esku uztea. Merkatuaren prezioak mantenduko dituzte; hau da, erabiltzaileek... [+]


2023-10-11 | ARGIA
Elizondoko adinekoen egoitza publifikatu du Baztango Udalak

Orain arte kudeaketa zeraman enpresa pribatuarekin kontratua eten eta Patronatuko Batzordeak erabaki du Zaintza Lanak SL udal enpresa publikoren esku uztea egoitza. Eraikinean obrak egingo dituzte eta egoiliarrentzako lekua murriztuko dute eraberritze lan horien ondorioz.


2023-09-10 | Mati Iturralde
Zaintzaren iraultza

Iraultza txikien akanpadan parte hartu nuen uztailean, zaintzari buruzko hausnarketa egiteko. Mahaiaren inguruan bost emakume eseri ginen: Arabako etxe- eta zainketa-langileen elkarteko Laura eta Shirley; Denon bizitzak erdigunean taldeko Paula eta Ainhoa; eta Kukuso taldeko... [+]


Eguneraketa berriak daude