ARGIA.eus

2021eko urtarrilaren 28a

'Dieselgate' ostean 'hybridgate'? Auto hibridoek aitortua baino %28 CO2 gehiago isurtzen dute

  • Gasoilezko motorren kutsaketak faltsutzen zituztela-eta, duela bost urte Dieselgate delakoak astindu baldin bazuen autogintzako industria, eskandalu berri bat egon daiteke lehertzeko zorian egunotan, Hybridgate deitu beharko genukeena: Transport & Environnement GKEak ikerlan batean erakutsi du erregai fosilak eta bateria elektrikoak erabiltzen dituzten auto hibridoek fabrikatzaileek aitortua baino askoz geihago kutsatzen dutela ingurumena eguneroko funtzionamenduan, gutxienez esandakoa baino %28 gehiago eta zenbait kasutan ofizialki deklaratuaren 12 halako.

ARGIA @argia
2020ko azaroaren 25a
Gero eta gehiago saltzen dira auto hibridoak: argazkian, Europako familien artean ezagunenetakoa den Mitsubishi Outlander modeloa.

Transport & Environment Gobernuz Kanpoko Erakundeak zenbait auto hibrido testatu arazi dizkio Emissions Analyticsi, zeina berezitua baitago autoek baldintza errealetan emititzen dituzten kutsagaien kontrolean. Azken finean, horretan baitatza Dieselgate-ak duela bost urte azaleratu zuen eskandalua: fabrikatzaileek laborategiko baldintza berezietan lortutako emisioak hartu dituzte gero estatuek oinarri errealtzat, baina eguneroko funtzionamenduan oso ezberdinak dira –askoz handiagoak– autoon benetako isuriak.

Ibilgailu hibridoak bi motorrek mugiarazten dituzte, batetik erregai fosila kontsumitzen duen motor termikoak eta bateriak zamatutakoko argindarra darabilen motor elektrikoak. Eta gertatzen da emisioak oso ezberdinak direla une bakoitzean dauden zirkulatzeko baldintzen arabera eta bateriaren karga-mailaren arabera. Transport & Environmenten txostenak azaleratu duenez, "baldintzarik onenetan ere, bateria erabat kargatuta edukita, auto hibridook emititu dute fabrikatzaileek iragarritakoa baino %28 eta %89 CO2 gehiago".

Testatu diren hiru auto hibridoen emisioak, kolorez irudikatuta: homologazioan iragarritako emisioak, bateria erabiliz edo erregai fosila erabiliz edo bateria kargatzen ari dela emititutakoak (iturria: Transport & Environment).

Baina are okerragoa da bateria hustuta dagoenean edo autoa abiadura handian dabilenean. Esaterako, Mitsubishi Outlander autoak –hibridoen artean Europan salduenak– kilometroko 46 gramo CO2 emititzen dituela iragartzen duten arren, bateria kargatzen doala zirkulatzean 164 gramo emititzen ditu. BMW X5 hibridoak berriz, bere homologazioan iragartzen duen arren kilometroko 32 gramo CO2 emititzen dituela, errealitatean 254 emititzen ditu. Volvo XC60-ak berriz, deklaratzen dituen 71 gramoen ordez 242 isurtzen ditu.

Ikerlan zehatza borobiltzeko, Transport & Environnementek Europako agintariei eskatu die lege eta arauetan egin ditzatela beharrezko aldaketan gero eta gehiago saltzen diren auto hibridoen benetako emisioak ezagutu eta kontrolatzeko, gainerakoan ustezko zero CO2 emisioen helburuari iruzurra egiten ari zaizkiolako, horrela alferrik galduz administrazio publikoek auto fabrikatzaileentzako dirulaguntzatan xahutzen dituzten dirutza izugarriak.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!


Automobilgintza kanaletik interesatuko zaizu...


Azkenak
EGILEA
Argia buletina
Egunaren laburpena
zure e-postan
Eguneraketa berriak daude