Derioko seminarioa linboan: zergak, lizentziak eta beste irregulartasun batzuk

  • Elizak ez du ondasun higiezinen gaineko zerga ordaintzen eraikinean dauden 83 enpresengatik. EH Bilduk salatu duenez, segurtasun arloan ere urteak eman ditu araudiak derrigortzen dizkion lanak egin gabe.

Urko Apaolaza Avila @urkoapaolaza
2019ko urriaren 29a
Jatetxe bat, hotela eta dozenaka enpresa barnebiltzen ditu Derioko seminarioaren enpresa-guneak (arg.: Seminario Jatetxea)

Derioko seminarioak 54.000 metro koadro ditu, Bizkaiko eraikin erlijioso handiena izan zen bere garaian, eta orain Txorierriko enpresa-gune garrantzitsua bihurtu da: dozenaka enpresa eta bulego daude alokairuan. Baina Eliza Katolikoak, hortik etekinak aterata ere, ez du jarduera ekonomikoagatik ondasun higiezinen gaineko udal zerga (OHZ) ordaintzen.

Hala salatu du Derioko EH Bilduk, enpresari batek padel pista berri batzuk jarri nahi dituela-eta. Udalean gehiengo osoa duen EAJk argudiatu du Eliza salbuetsita dagoela zerga hori ordaintzera; aste honetako udal plenoan azalpen gehiago eman beharko ditu baina.

Seminarioak apaizgaitegi bezala ateak itxi zituen 70eko hamarkadan, baina geroztik jarraitu du Bilboko Gotzaindegiaren jabetzakoa izaten, eta 1992an hasi zen enpresei lokalak alokatzen. EH Bilduko zinegotzi Jose Angel Aurrekoetxeak ARGIAri azaldu dionez gutxienez 2008tik ari dira eraikinean gertatzen diren irregulartasunekin bueltaka.

Derioko EH Bilduk urteak daramatza irregulartasunen inguruko informazioa eskatzen. Jabetu ziren ia enpresa guztiak lizentziarik gabe zeudela, gotzaindegiak ez baitzeukan larrialdi planik ez eta horretarako obrarik eginda ere

Jabetu ziren ia enpresa guztiak lizentziarik gabe zeudela, gotzaindegiak ez baitzeukan larrialdi planik ez eta horretarako obrarik eginda ere. Urteotan pasabideak araudira moldatu dituzte, “baina lokalen barruan egindako lanen berririk ez daukagu”, dio zinegotziak. Kexu da udal gobernuak informazioa oso pittinka eta modu “eteroan” helarazten dielako.

Seminarioa 83 enpresaren eta beste lokal ugariren egoitza da egun: aholkularitza, teknologia eta baita elikadurakoak ere. Horrez gain, jatetxea eta 70 gelatako hotela dauka, eta haren jabe bakarra da Administradora de Inmuebles Seminario SL, eraikin osoa kudeatzeko Bizkaiko Gotzaindegiak sorturiko sozietatea –Juan Manuel Seco Escartin ingeniari eta gotzaindegiko idazkari nagusia da horko administratzailea–.

Elizbarrutiko artxiboa ere Derioko seminarioan dago, baina Bilbora eramateko asmoa dute, Mutualiarekin batera egin nahi duten Barrainkua kaleko eraikin polemikora. Denera 1.200 lagun ari dira lanean Derioko “enpresa gune estrategikoan”, bere webgunean ageri den moduan.

Milaka euro ordaindu gabe

Derioko Seminarioko enpresen egoera berriz ere mahairatu da, inbertitzaile batek kirol gune erraldoi bat eraiki nahi duela jakin denean. Ia bost milioi euroko proiektua da eta gimnasio handi bat, futbol zelaiak, golf eskola eta padelean aritzeko 18 pista izango lituzke –orain daudenek ez dituzte gutxieneko osasun-arauak betetzen–. Baina udalak orain arteko irizpideari eutsiz gero, gotzaindegiak ez luke instalazio horregatik OHZrik ordaindu beharko.

 

 

Golf eta padel pistei loturiko enpresen proiektu batek mahairatu berriz ere Elizak ez duela higiezinen zerga ordaintzen (arg: Padel Bizkaia)

 

 

Gaia aste honetako udal plenoan eztabaidatuko dute berriz ere, eta EH Bilduk bakarrik ez, PSEk ere Elizari zerga hori kobratzeko mekanismoak martxan jartzea eskatuko du, El Correo egunkariak argitaratu duenez. Zenbait kalkuluren arabera, baliteke Gotzaindegiak urtero ehun mila eurotik gora zor izatea.

Elizak OHZ ordaintzeko eskariak ugaritzen ari dira Espainiako Estatuko beste zenbait tokitan ere. Vatikanoarekin 1979an sinaturiko hitzarmenean babesten da administrazio eklesiastikoa, bere eraikin erlijioso edo sozialengatik zerga ez ordaintzeko: “Baina hitzarmenean garbi esaten da ikastetxeak edo ospitaleak daudela salbuetsiak, ez enpresak. Legez kanpoko zerbait da eta prebarikatzen ari dira”, dio Aurrekoetxeak, eta gogorarazi du Francisco aita santuak berak iradoki duela Elizak zerga hori ordaindu beharko lukeela, Italian egiten duen moduan.

Derioko alkate Esther Apraiz (EAJ) mezenasgoaren foru arauan oinarrituriko udal txosten batera joaz azaldu du Gotzaindegiari seminarioko jarduera ekonomikoengatik ez kobratu izana. Espainiako Auzitegi Gorenaren bi sententzia aipatzen ditu txosten horrek, salbuespenaren aldekoak biak, baina EH Bildurentzat “ez dira hemengo kasua bezalakoak”.

Elizaren "aterkipeak" eraikinari ematen dien malgutasunaz aprobetxatzea leporatzen die Gotzaindegiari eta Derioko Udalari EH Bilduk, eta denek zerga berdinak ordaindu beharko lituzketela uste du, seminarioaren linboan daudenek ere bai.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!


Eliza Katolikoa kanaletik interesatuko zaizu...
Azkenak
EGILEA
Eguneraketa berriak daude