Euskal Herriko ustezko ustelkeria sare baten inguruan egin den epaiketa handiena, 'De Miguel' auzia, beste behin atzeratuko da defentsek eta fiskalak hala eskatuta. Epaiketak uda sasoian etena izan ondoren, irailean zen hastekoa akusatuen deklarazioekin. Baina errunduntasuna onartzearen truke zigor eskaera murriztea negoziatzen ari dira eta ondorioz baliteke azarora arte ez berrekitea.

Josu Izaguirre Arabako fiskal buruak onartu du negoziazioa "konplexua" izaten ari direla, auzipetu ugari orain prest daude euren erruduntasuna onartzeko –auzia ireki zenetik ez dute halakorik egin–, baina badira zenbait oraindik euren absoluzioa eskatzen dutenak.

Adi! Arabako ustelkeriaren kontrako elkarteak atzerapen hori salatu du eta esan du auzian zehar fiskalak akusazioa egiteko erakutsitako argudioen sendotasun handiarekin kontraesanean legokeela orain zigor-eskaerak jaistea.

Denera 32 eta 4 urte arteko kartzela zigorra eskatu du fiskalak auzipetuentzat, horietako asko EAJko kargu ohiak edo alderdi horri estuki lotuak. Adi!-k, hain zuzen, jeltzaleek auzipetu horiei emandako babesa salatu du eta esan du halako kasuak ez direla salbuespena: "Fiskaltzari eskatzen diogu azkeneraino joan dadila, erortzen dena erortzen dela ere".