Crowdfundinga abiatu dute Gipuzkoako erraustegiaren kutsadura kontrolatzeko

  • Erraustegiaren Aurkako Mugimenduak diru bilketa abiatu du Donostiako erraustegia piztuz gero eragingo duen kutsaduraren kontrol independentea finantzatzeko. Crowdfunding orria publiko egin dute, baita kontu korronte bat zabaldu ere.

Zero Zabor @zero_zabor
2019ko irailaren 24a
Kanpainarako prestatu duten irudia.

Zubieta Lantzen elkarteak abiatu zuen ikerketa zientifikoari babesa adierazi dio Erraustegiaren Aurkako Mugimenduak. Jakinarazi dutenez, asmoa urtero kutsadura frogak egitea izango da. Horretarako, Zubietako azpiegitura piztu aurretik egoera zein den zientifikoki frogatuta uzteko, laginak hartu zituzten ToxicoWatch fundazioak eta Eusko Jaurlaritzak akreditatutako enpresa batek erraustegiaren eragin eremuan dauden hainbat herritan, gehi eremutik urrunagoko beste batean, Goierrin. Emaitzak erraz konparatu ahal izango dituztela diote, arrautza, goroldio, lur eta landareetako laginak hartu baitituzte, geolokalizazio eta beste hainbat daturekin batera.

Diru bilketari ekin diote orain: "Nazioarteko ikerlariak Euskal Herrira ekarri, laginak hartu eta beren herrialdeetan azterketa analitikoak egiteak diru kostu bat dauka. Horregatik, Errausketaren Aurkako Mugimendua osatzen dugun talde eta herritarrok erabaki dugu ikerketa babestea eta finantzaketa lortzen laguntzea".

13.000 euro bildu behar dituztela jakinarazi dute asteartean prentsara bidalitako ohar baten bidez. Norbanako, eragile sozial eta Udalei dei egin diete ikerketa babestera. "Bakoitzak ahal eta nahi duen neurrian ekarpena eginez, denon artean, kutsaduraren datu zientifikoak gure eskuetan izatea autodefentsa gisa ulertu behar dugu. Hortik gora jasotzen duguna erraustegiaren aurkako borrokarako baliatuko dugu", adierazi dute.

Ordainketak berehala egin behar dituztela diote, eta horregatik, jendea animatu nahi izan dute ekarpena "azkar" egitera. Esker gisa, webgunean ekimena babestu duten eragile eta norbanakoen izenak argitaratuko dituztela adierazi dute, mezenasek nahi badute behintzat. Lotura honetan egin daitezke ekarpenak. Dirua jartzen duenari opari gisa errausketaren aurkako banderolak emango dizkiote.

Kontu korronte bidez ere ekarpena egiteko aukera ireki dute. ES45 2095 5069 06 1064132086 da kontua eta titularra Zubieta Lantzen.

Bideo hau ere prestatu dute kanpaina sustatzeko.

 

 

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!


Gipuzkoako erraustegia kanaletik interesatuko zaizu...
Azkenak
EGILEA
Eguneraketa berriak daude