Zalaparta handia izan du ekimenak, batez ere gertatu aurretik, Altsasun ez baita arazorik izan elkarretaratzearen bueltan. Ines Arrimadas Ciudadanoseko buruarekin batera izan dira Nafarroako buru Carlos Perez-Nievas edota Fernando Savater filosofoa, besteak beste. Biktimen elkarteetako hainbat ordezkari ere izan dira eta Vox-eko kideak ere bai, Guaixe-k jakinarazi duenez.

Altsasuko auzi entzutetsua eta gero bereziki, urtez urte Espainiako hainbat alderdi eta erakunde ari dira baliatzen Altsasu Guardia Zibilari sostengua agertu eta Ospa! eguna eta herriko gazteak kriminalizatzeko. Horietako hainbatek, kurtso politikoari hasiera emateko baliatzen du ekitaldia.

Espainiako Kongresuan PPk gogor egin du Ospa! egunaren aurka eta eskatu dio Barne Ministerioari neurriak har ditzala ekitaldia eragozteko. Nafarroako Espainiako Ordezkaritzako buru José Luis Aristik erantzun du ekitaldiarekin desadostasuna erakutsiz, baina adierazi du gaur egungo legediarekin ezin dela debekatu.

Hausnarketa, manifestazioa eta kontzertuak

Irailaren 3an larunbatarekin ospatuko da Altsasun Ospa! eguna. Herrian aspalditik antolatzen den ekitaldian, Espainiako segurtasun indarrak herritik atera daitezen eskatzen dute. Hainbat ekitaldi egingo dira eta esanguratsuena manifestazioa izango da: 18:00etan aterako da Lortia plazatik Poliziarik ez! Langileon aurkako errepresioa gelditu goiburupean. Eguerdian, Lortia Aretoan polizia ereduari buruz jardungo dute, eta ondoren bazkaria izango da plaza horretan bertan. 22:00etan, aldiz, kontzertuak izango dira, Habemus Papam eta Katarsia taldeekin.