ARGIA.eus

2020ko maiatzaren 25a

Bizitzaren "defendatzaileak"

  • Zenbat aldiz entzun diegu iraganean hainbat politikari eta patronalari indakeria gaitzesten, guztiaren aurrean bizitza defendatu behar dela argudiatuz? Bada orain, interes ekonomikoak lehenetsi dituzte bizitzaren gainetik eta industria-jarduera geldiaraztearen aurka agertu dira. Hori bakarrik ez, gainera datorkigun krisiaren kopla-buruak ere aurkitu dituzte: osasuna bermatzeko produkzioa gelditu nahi duten sindikatu, alderdi eta langileak, hain zuzen.

Juan Mari Arregi
2020ko apirilaren 01a
Koldo Mediavilla jeltzaleak artikulu polemikoa idatzi du jarduera produktiboa guztiz etetera daudenen kontra (arg: Hamaika).

Zenbat aldiz, ETAren jarduera armatuaren garaietan, Espainiako Estatu osoko politikari zein enpresaburuei entzun izan diegu bere indarkeria gaitzesten, guztiaren aurrean bizitza defendatu behar dela argudiatuz. Besteak beste, Euskal Herrian, Urkullu, Ortuzar, Mediavilla eta Tapia bezalako pertsonei eta euskal patronaletako presidente eta kideei entzun dizkiegu halako hitzak. Bada, gaur, munduan eta baita Euskal Herrian ere milaka hildako uzten ari den pandemia honen astindu hilgarriarekin, badirudi ez zaiela axola hainbeste jenderen bizitza, eta hura galdu dezaketen beste askorena ere ez.

Izurrite honen hasieratik, aipatutako politikariak eta patronalak funtsezkoak ez diren euskal industria-jarduera geldiaraztearen aurka agertu dira, sindikatu eta alderdi abertzaleen, euskal prentsaren –horien artean hedabide hau– eta kasu batzuetan planto egin eta lantokiak geldiaraztera iritsi diren langileen iritziaren aurka.

Baina ikusten denez arestian aipaturiko pertsona horiek, interes ekonomikoak lehenetsi dituzte bizitza eta laneko osasunaren gainetik, eta horregatik agertu dira Espainiako Gobernuak hartutako erabakiaren aurka –honek, dena den, azkenean hainbat nabardura egin ditu eta gutxieneko produkzioarekin segitu ahal izango dute euskal enpresek–.  

Haserretu ez ezik, datorrenari aurrea hartu eta "hurrengo egunerako" kopla-buruak bilatu nahi dituzte, pandemia honek ekarriko dizkigun ondorio ekonomikoengatik. Haiek eskuak garbitzen dituzte jada, eta funtsezkoa ez den euskal industria-jarduera gelditzearen aldekoak izango dira gainera datorkigun krisi ekonomikoaren benetako erantzuleak.

Lotsa ematen du ikusteak gaur egun gobernuan dauden ordezkari politikoak patronalekin bat egiten kapitalaren interes ekonomikoak defendatzeko. Ez zaie bizitza axola. Gutxiengo baten zerbitzura dagoen negozioa interesatzen zaie. Herritarrek ez dute hori ahaztu behar. Bitartean, bizitzaren defendatzaile, bai, baina Zaldibarren bi langilek desagertuta jarraitzen dute.

Bidali zure iritzi artikuluak iritzia@argia.eus helbide elektronikora
ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!


Iritzia kanaletik interesatuko zaizu...

Azkenak
EGILEA
Argia buletina
Egunaren laburpena
zure e-postan
Eguneraketa berriak daude