Nafarroako Justizia Auzitegi Nagusiak jakitera eman duenez, epaileak sekretuak ezagutaraztearen delituan erruduntzat jo du gizona, baita osotasun moralaren aurkako delitu baten erruduntzat ere. Hain zuzen ere, Jose Angel Prendak eraso sexuala egin zion gaztearen irudi bat jarri zuen Twitterren. Auziaren sumarioan sartuta zegoen fotograma bat zen, eta Nafarroako Auzitegiak espresuki debekatu zuen zabaltzea.

Irudiarekin batera, iruzkina idatzi zuen: "La Manadak ustez bortxatutako neskak irudi hori ez zabaltzeko eskatu du, agian urdanga mozkor bat baino ez zela pentsatuko dugulako".

Argitalpen horrek 64 iruzkin sortu zituen eta 13 "atsegin dut", eta 16 aldiz partekatu zuten beste pertsona batzuek. Erasoa jasan zuen pertsona "berriz biktimizatzea" eragin zuen epailearen ustez. Epaiak, gainera, nabarmendu du irudi horren ondorioz, 'La Manada'-ren bortxaketaren biktima gisa identifikatu ahal izan zutela, eta horren ondorioz tratamendu psikologikoa jaso behar izan zuela, ikasketak utzi behar izan zituela eta hiru hilabete baino gehiagoz atzerrira bizitzera joan behar izan zuela.

Epaileak bere kondena-epaian adierazi duenez, taldean bortxatu zuten emakumea "barregarri eta lotsatuta geratu da" eta, gainera, irudia zabaltzearen ondorioz, "prozedura horretan biktima-izaera ezagutzen ez zuten senideek eta ezagunek horren berri izan zuten".

Bi urte eta egun bateko zigorra ezartzeaz gain, 6.000 euroko kalte-ordaina eman beharko dio biktimari, eragin dion kalte moralagatik. Eta 4.680 euroko isuna ordaindu beharko dio.

Erabaki judizialaren aurka helegitea aurkez daiteke Nafarroako Auzitegian.