MTVaren fokuak itzali diren honetan Bilbo normaltasunera itzuli dela eta “biztanleriaren esplotazioak, indibidualismoak eta miseria existentzialak” berriz ageriko egin direla adierazi du eragileak. Itzulingurururik barik, argi mintzatu dira: “MTVak alde egin du eta guk ekimen honen ondorioak ordaindu beharko ditugu”.

Errepresioa jasan izana salatu dute, auzoen militarizazioa pairatzeaz gain burutu dituzten mobilizazioetan identifikazio eta atxiloketei aurre egin behar izan baitiete. Jakinarazi dutenez, identifikazioen kasuan poliziak “isun eta ondorio judizial lazgarriekin” mehatxu egin die, eta atxilotua izan den pertsonari autoritatearen aurkako atentatua egotzi diote. Jakinarazi dutenaren arabera, azken honi epaiketa azkarra egin nahi izan diote azaroaren 5eko astelehenean, baina epaiketaren epea atzeratzea lortu dute, “hainbesteko lastertasun honek bere defentsa eskubidea urratu” egiten duelako. Jasandako errepresio honek bultzatuta, “herri honetan bizi behar izan dugun enegarren muntaia polizial honen aurkako mobilizazioak” egitea aurreikusi dute.

Poliziaren presentziak eta honek eragindako errepresioaren gainetik, baina, hiriko kaleak “borroka eta elkartasunez” bete izanagatik pozik agertu dira. “Auzoetatik eta hiria bizi duten subjektu desjabetu eta mendekoek eraikitako beste hiri/ lurralde/ bizi eredu bat posible dela” ageriko egin da, antolatzaileen arabera. Hala bada, eskerrak eman dizkiete mobilizazioetan parte hartu duten pertsona eta kolektiboei.

MTVa igaro den honetan, eragilea ez da martxan jarraitzeko arrazoirik barik geratu: “MTVa joan egin da, baina guk hemen jarraitzen dugu. Eta hemen jarraituko dugu. Erakusleiho-hiri honen aurka, eta honetatik haratago, beste Bilbo bat eraikiz”.