2022ko uztailetik ikertzen aritu dira martxoaren 21ean atxilotu zituzten hiru Urruñarrak, Fernand Perret Bidasoa Etorkinekin elkarteko kideak azaldu duenez. Bera izan zen atxilotuetako bat, bere emaztearekin eta arrebarekin batera. Arratsalde horretan utzi zituzten aske. Larunbatean elkarretaratzea egin dute Baionan, Darmaninen inmigrazio-lege proiektua, mugak ixtea eta hiru atxiloketak salatzeko. Bertan eman zuen bere lekukotasuna Perretek, Kazetak jaso duenez.

Bidasoa Etorkinekin elkarteko kideak azaldu duenez, Urruñako etxean atxilotu zituzten hirurak, eta beren bi etxeak arakatu zituzten, inori abisua emateko baimenik gabe. "Desagertu egin ginen". Ia egun osoa pasa zuten komisaldegian, eta haren parean elkarretaratzea egin zuten hainbat pertsonak.

Bederatzi hilabete ikerketapean

Ez da egun batetik besterako mugimendua izan. Perretek azaldu duenez, duela bederatzi hilabete abiatu zuten atxilotuen inguruko ikerketa. "Arau-haustea, talde antolatuan atzerritarrei Frantzian sartzeko, zirkulatzeko eta egonaldi irregularra atzemateko laguntza ematea eta gaizkile talde batean parte hartzea, delitu bat egiteari begira" izan ziren ikertzeko arrazoiak. Ordutik hona, partikularki zelatatu, telefonoa entzun eta autoetan GPSak ezarri dizkiete.

Migranteak Pausa harrera gunera eramaten zituelakoan abiatu zuten ikerketa, mugimendu hori soldatapean egiten zutelakoan. Bidasoa Etorkinekineko kideak ukatu egin du inoiz migrante bati muga pasatzen lagundu dionik. "Ainitz ekarri ditut etxera gurekin bazkaltzera, batzuetan etxean ostatu hartu dute, eta bakoitzari diru apur bat eman diot, haien helmugara iristeko autobus tiketa eros zezaten". Salatu du atxiloketen helburua Bidasoa Etorkinekin elkartea kaltetzea dela, eta "gure zintzotasuna eta gure ekintzen izaera legala zalantzan jartzen saiatzea".

Darmanin inmigrazio-lege proiektua

Frantziako Gobernuak egin duen inmigrazio lege-proiektuaren inguruko eztabaida izango da gaur Frantziako Senatuan. Larunbateko mobilizazioan legearen aurka agertu ziren manifestariak. Legeak "immigrazioa kontrolatzea" eta "integrazioa hobetzea" ditu helburu, gobernuaren arabera. Horretarako, Gobernuak adierazi du etorkinak Frantziatik kanporatzeko aginduak "hobeto betearazteko" asmoa agertu du. Gerald Darmanin barne ministroak adierazi du "etorkin delitugileak" Frantziatik kanporatu nahi dituela, eta "lan egitera datozenak lagundu".